بھارت کے ایک یوٹیوبر نے بالی ووڈ اسٹار اکشے کمار پر الزام عائد کیا ہے کہ انہوں نے اداکارہ ریا چکروتی کی کینیڈا فرار ہونے میں مدد کی ہے، اس پر اکشے کمار نے یوٹیوبر پر 5 سو کروڑ انڈین روپے (10 ارب پاکستانی روپے) ہتک عزت کا دعویٰ دائر کر دیا ہے۔
پریس ٹرسٹ آف انڈیا کے مطابق اکشمے کمار نے آئی سی لیگل نام کی لا فرم کے ذریعے 17 نومبر کو قانونی نوٹس جاری کیا تھا جس میں لکھا تھا کہ راشد صدیقی نامی شخص نے اپنے یوٹیوب چینل ایف ایف نیوز پر ان کے خلاف توہین آمیز ویڈیوز بنائی ہیں۔
اکشے کمار نے راشد صدیقی سے غیر مشروط معافی طلب کی ہے اور ان سے اپنے چینل سے نامنسب ویڈیوز ہٹانے کا مطالبہ بھی کیا ہے۔
واضح رہے یوٹیوبر راشد صدیقی پر ممبئی پولیس نے بھی ہتک عزت سے متعلق ایک اور مقدمہ درج کر رکھا ہے۔
اس حوالے سے لا فرم کا کہنا ہے کہ کلائنٹ اکشے کمار کے مطابق انہیں راشد صدیقی کی توہین آمیز ویڈیوز کے باعث ذہنی دباؤ کا سامنا رہا اور ان کی ساکھ بھی متاثر ہوئی ہے جس کیلئے انہوں نے 500 کروڑ روپے کا مطالبہ کیا ہے۔
یوٹیوبر کی جانب سے شیئر کی گئی ویڈیو میں کہا گیا ہے کہ اکشے کمار نے اداکارہ ریا چکروتی کو کینیڈا جانے میں مدد فراہم کی اور یہ بھی کہ ان کی مہاراشٹر کے وزیر آدتیا ٹھاکرے اور ممبی پولیس کمشنر سے سشانت سنگھ راجپوت کی موت سے متعلق خفیہ ملاقاتیں ہوتی رہی ہیں۔
لا فرم نے راشد صدیقی کو جاری کئے گئے نوٹس میں لکھا کہ مذکورہ ویڈیوز جھوٹی اور بے بنیاد ہیں اور انہیں عوام کو دھوکہ دینے کیلئے جاری کیا گیا ہے۔
یاد رہے کہ بھارتی اداکار سشانت سنگھ راجپوت 14 جون کو ممبی میں اپنے اپارٹمنت میں مردہ حالت میں ملے تھے، اس کے بعد ان کی گرل فرینڈ ریا چکروتی کو نارکوٹکس کنڑول بیورو نے گرفتار کر لیا تھا تاہم وہ اب ضامنت پر ہیں۔
ممبی پولیس نے اس کے علاوہ جو کیس راشد صدیقی کے خلاف درج کیا ہے وہ ممبئی پولیس، مہاراشٹر حکومت اور وزیر آدتیا ٹھاکرے کے خلاف توہین آمیز الزامات لگانے سے متعلق ہے۔
