وزیراعظم کے مشیر برائے سادگی مہم و ادارہ جاتی اصلاحات ڈاکٹر عشرت حسین نے اعلان کیا ہے کہ قومی ایئر لائن (پی آئی اے) کے ملازمین کی تعداد 14 ہزار سے کم کر کے 7 ہزار کرنے اور پاکستان اسٹیل ملز کو لیز پر دینے کا فیصلہ کر لیا گیا ہے۔
وفاقی وزیر اطلاعات و نشرات شبلی فراز کے ہمراہ پریس کانفرنس کرتے ہوئے انہوں نے بتایا کہ اس اقدام سے پی آئی اے کے ایک طیارے پر ملازمین کی شرح 500 سے کم ہو کر 250 ہو جائے گی۔
ڈاکٹر عشرت حسین نے کہا کہ 4 اہم اداروں میں اصلاحات لانے کا منصوبہ بنایا گیا ہے، اس سلسلے میں فیڈرل بورڈ آف ریونیو میں خودکار نظام لا رہے ہیں جس کے بعد ایکسپورٹرز کو ایف بی آر نہیں آنا پڑے گا۔
ڈاکٹرعشرت حسین نے کہا کہ پاکستان اسٹیل ملز کو لیزکرنے جارہے ہیں، اسٹیل ملز کی 19 ہزار ایکڑ زمین حکومت اپنے پاس رکھے گی، جبکہ 1200 ایکڑ زمین اسٹیل ملز کی ملکیت ہوگی جسے لیز پر دے کر پیداوار 3 ملین ٹن تک لیکر جائیں گے۔
ان کا کہنا تھا کہ پاکستان ریلوے کی پانچ کمپنیاں بنائی جا رہی ہیں، ایم ایل ون منصوبہ کے لیے الگ کمپنی ہوگی۔
ڈاکٹر عشرت حسین نے کہا کہ اداروں کو مضبوط اور فعال بنانا طویل اور مشکل عمل ہوتا ہے۔ وزیراعظم نے ذمہ داری دی کہ اداروں کے سربراہان کی تقرری مکمل شفاف ہونی چاہیے۔ ہرادارے کے سربراہ کیلئے تین موضوع امیدواروں کے نام وفاقی کابینہ کو پیش کیے جاتے ہیں۔
انہوں نے کہا کہ حتمی فیصلہ وزیراعظم کی بجائے وفاقی کابینہ میں کیا جاتا ہے۔ گریڈ 21 سے 22 میں تمام ترقیاں میرٹ اور شفافیت کی بنیاد پر کی گئی ہیں۔ اداروں کی بنیاد مضبوط کرنے میں وقت لگے گا۔ اداروں میں تعیناتیوں سے متعلق ماہرین سے مشورے کیے گئے۔
پریس کانفرنس سے خطاب کرتے ہوئے شبلی فراز نے کہا کہ ادارے فعال بنانا ہماری اولین ترجیح ہے۔ وزیراعظم کی ہدایت پراداروں کی بہتری کیلئے ٹیم بنائی گئی ہے۔ ڈاکٹرعشرت حسین ٹیم کے سربراہ ہیں۔
شبلی فراز نے کہا کہ ملکی ادارے وقت کیساتھ بہتری نہ لائیں تو کارکردگی کم ہوتی جاتی ہے۔
