اسلام آباد میں دن دیہاڑے کروڑوں کی ڈکیتی، سونا، نقدی لوٹ لی گئی

وفاقی دارالحکومت اسلام آباد میں چور ایک سنار کی دکان سے 350 سے 400 تولے سونا اور 40 لاکھ روپے نقدی لے کر فرار ہو گئے۔
ذرائع کے مطابق تاریخ کی سب سے بڑی چوری کا مقدمہ اسلام آباد کے تھانہ کوہسار میں درج کرا دیا گیا ہے، پولیس نے معاملے کی تحقیقات کا آغاز کر دیا ہے۔
دکان کے مالک نے تھانے میں ساڑھے 4 کروڑ روپے چوری ہونے سے متعلق ایف آئی آر درج کرا دی ہے۔
شیخ محمد فرید نامی ایک سنار نے پولیس کو بتایا کہ ای 11 چار میں ان کی دکان پر تین افراد جیولری دیکھنے کے بہانے آئے تھے کہ اچانک انہوں نے مجھ پر پستول تان لی۔
انہوں نے بتایا کہ ملزمان نے مجھے اور میرے ملازم کو ایک کمرے میں بند کیا اور ساڑھے چار کروڑ کی قیمتی اشیاء اور نقدی لے کر فرار ہو گئے۔
مالک دکان کا کہنا تھا کہ ایک چور کی عمر 25 سے 30 سال، دوسرے کی 35 سے 40 اور تیسرے کی 45 سال کے درمیان تھی۔
انہوں نے پولیس کو بتایا کہ ملزمان کے چہرے دیکھ کر ان کی شناخت کر سکتا ہوں۔
پولیس حکام نے اپنے بیان میں کہا ہے کہ وفاقی دارالحکومت سے اتنی بڑی چوری کی تحقیقات کا آغاز کر دیا ہے اور ملزمان کی گرفتاری کے لیے چھاپے مارے جا رہے ہیں۔
پولیس حکام کا کہنا ہے کہ معاملے کی ہر طرح سے چھان بین کی جائے گی اور متاثرہ دکان مالک کو انصاف دیا جائے گا۔