وزیراعظم عمران خان کی زیر صدارت ہونے والے وفاقی کابینہ کے اجلاس میں زیادتی کے مجرموں کی کیسٹریشن (نامرد بنانے) کے قانون کی منظوری دے دی گئی۔
ذرائع کے مطابق کئی وزراء سرعام پھانسی کے حق میں تھے، کابینہ کے کئی ارکان پھانسی کی سزا کو قانون کا حصہ بنانے پر اصرار کیا، ان میں فیصل واوڈا، اعظم سواتی اور نورالحق قادری شامل تھے۔
ذرائع کا کہنا ہے کہ وزیراعظم نے کہا کہ ابتدائی طور پر نامرد بنانے کے قانون کی طرف جاتے ہیں، قانون سازی میں تاخیر نہیں کریں گے اور سخت سے سخت قانون کا اطلاق یقینی بنایا جائے گا۔
انہوں نے کہا کہ متاثرہ خواتین یا بچے بلاخوف وخطر اپنی شکایات درج کرا سکیں گے، متاثرہ خواتین وبچوں کی شناخت کے تحفظ کا بھی خاص خیال رکھا جائے گا۔
اجلاس میں وفاقی کابینہ کو بتایاگیا کہ قانونی ٹیم نے ‘ریپ قانون آرڈیننس’ کے مسودہ پر کام مکمل کرلیا ہے، خواتین پولیسنگ، فاسٹ ٹریک مقدمات، اور گواہوں کا تحفظ قانون کا بنیادی حصہ ہوگا۔
