سلطنت عثمانیہ کی عظیم تاریخ کی عکاسی کرتا ترکی کے معروف ڈرامے ارطغرل غازی نے پاکستان ٹیلی ویژن کے یوٹیوب چینل پر ایک نیا ریکارڈ قائم کر دیا ہے۔
پاکستان ٹیلی ویژن سے ہفتے میں 5 دن نشر کیے جانے والے ڈرامے کے لیے بنائے گئے یوٹیوب چینل کے ایک کروڑ سبسکرائبرز ہو چکے ہیں۔
صرف 7 ماہ کے قلیل عرصے میں ایک کروڑ سبسکرائبرز حاصل کرنے والا یہ چینل اہم سنگ میل عبور کر چکا ہے۔
یوٹیوب پر بنائے جانے والے چینلز کو اتنی جلدی مقبولیت حاصل نہیں ہوتی۔
اس سے قبل ٹی آر ٹی ارطغرل بائے پی ٹی سی کے نام سے بنایا گیا چینل پہلے دن ہی 40 ہزار سبسکرائبرز اپنے نام کر چکا تھا جب کہ ارتغل غازی کی پہلی قسط کو 8 کروڑ 30 لاکھ مرتبہ دیکھا جا چکا ہے۔
یاد رہے رواں برس 25 اپریل کو وزیر اعظم پاکستان عمران خان کی فرمائش پر پاکستان ٹیلی وژن پر اردو ڈبنگ کے ساتھ نشرکیا گیا تھا، ڈرامے کے دو سیزن نشر کیے جا چکے ہیں۔
5 سیزن پر مشتمل ڈراموں کی سیریز کے لیے بنائے گئے چینل پر پہلے دو سیزن کی اقساط کو اوسطاً پچاس لاکھ بار دیکھا جا چکا ہے۔
13ویں صدی کے اناطولیہ کی عظیم الشان داستان کو بیان کرتا یہ ڈرامہ نا صرف پاکستان بلکہ دنیا بھر میں مقبولیت کے ریکارڈ توڑ چکا ہے۔
ایمان، انصاف اور محبت کی داستانوں پر مشتمل یہ کہانی ایک ایسے جنگجو کی ہے جس نے اپنی بہادری اور جرات سے نا صرف اپنے قبیلے بلکہ تمام عالم اسلام کی تقدیر کو بدل کر رکھ دیا۔
ڈرامے میں اوغوز ترکوں کے خانہ بدوش قبیلے کائی کی محنت اور لگن سے اپنا آپ منوانے کی داستان نے موجودہ دنیا کے مسلمانوں کو حیرت زدہ کر دیا ہے۔
ڈرامے کو پاکستان میں اردو زبان میں نشر کیے جانے سے پہلے دنیا کے 60 ممالک میں مختلف زبانوں میں نشر کیا جا چکا ہے۔
