والدہ کے جنازے میں شرکت کے لیے شہباز شریف کی رہائی منظور

مسلم لیگ ن کے صدر میاں نواز شریف کی والدہ شمیم اختر میں جنازے میں شرکت کے لیے شہباز شریف اور حمزہ شہباز کی پیرول پر رہائی کے معاملے پر کابینہ کی سفارشات کی منظوری دے دی۔
میڈیا رپورٹس کے مطابق وزیراعلیٰ عثمان بزدار نے شہباز شریف اور حمزہ شہباز کی پانچ روز کے لیے پیرول پر رہائی کی منظوری دی۔
وزارت داخلہ کی جانب سے جاری بیان میں بتایا گیا ہے کہ شہباز شریف اور حمرہ شہباز کو 27 نومبر دوپہر دو بجے پیرول پر رہا کیا جائے گا۔
میڈیا ذرائع کا کہنا ہے کہ پنجاب کابینہ نے سرکولیشن کے ذریعے 5 روز کے لیے شہباز شریف اور حمزہ شہباز کی پیرول پر رہائی کی منظوری دی تھی۔
کابینہ ممبران سے منظوری کے بعد سمری وزیراعلی پنجاب کو ارسال کی گئی تھی۔
یاد رہے سابق وزیراعظم میاں نواز شریف کی والدہ شمیم اختر 22 نومبر کو 90 سال کی عمر میں لندن میں انتقال کر گئی تھیں۔
شہباز شریف اور حمزہ شہباز کی پیرول پر رہائی کی درخواست سابق وزیراعظم نواز شریف اور شہباز شریف کی والدہ شمیم اختر کے انتقال کے باعث دی گئی تھی۔
اس حوالے سے صوبائی وزیر برائے جیل خانہ جات فیاض الحسن چوہان کا کہنا تھا کہ پیرول پر رہائی شہباز شریف اور حمزہ کا قانونی حق ہے تاہم دونوں کو بیگم شمیم اختر کی میت پاکستان پہنچنے سے ایک روز قبل رہا کیا جائے گا۔
دوسری جانب مریم نواز کو اپنی دادی کے انتقال کی خبر پشاور میں پی ڈی ایم کے جلسے کے دوران ملی جس کے بعد مریم نواز جلسہ ادھورا چھوڑ کر لاہور روانہ ہو گئی تھیں۔
اپنے ٹویٹر پیغام میں دادی کے انتقال کی خبر تاخیر سے ملنے پر انہوں نے حکومت کو تنقید کا نشانہ بھی بنایا تھا۔
ان کا کہنا تھا کہ موبائل سروس نا ہونے کی وجہ سے دو گھنٹے تاخیر سے دادی کی وفات کی اطلاع ملی۔ انہوں نے لکھا کہ کسی حکومتی فرد میں اتنی جرات نہیں تھی کہ وہ دادی کے انتقال کی خبر مجھے دیتا۔
ایک اور ٹویٹر پیغام میں انہوں نے میاں نواز شریف کو دادی کے جنارے میں شرکت کے لیے پاکستان آنے سے بھی منع کیا۔