وزیراعظم عمران خان نے گلگت بلتستان کے نئے وزیراعلیٰ کے لیے خالد رشید کے نام کی منظوری دے دی ہے۔
وزیراعظم عمران خان کی زیر صدارت ہونے والے اجلاس میں گلگت بلتستان کے نئے وزیراعلیٰ کا نام فائنل کیا گیا۔
چیف آرگنائزر سیف اللہ نیازی نے تصدیق کی ہے کہ وزیراعلیٰ گلگت بلتستان کیلئے خالد خورشید کا نام فائنل کیا گیا ہے، وہ ضلع استور سے رکن گلگت بلتستان اسمبلی منتخب ہوئے ہیں۔
گلگت بلتستان کے وزیراعلیٰ کے امیدوار کے لیے خالد خورشید اور فتح اللہ میں مقابلہ تھا، وزیراعظم نے مرکزی اورگلگت بلتستان قیادت سے خالد خورشید کی نامزدگی کیلئے مشاورت کے بعد نام فائنل کیا۔
اس سے قبل یہ خبریں تھیں کہ گلگت بلتستان میں وزیر اعلیٰ کے انتخاب کا معاملہ تاخیر کا شکار ہوگیا ہے اور اسمبلی میں موجود تحریک انصاف کے کارکنان کسی ایک نام پر متفق نہیں ہو سکے۔
نئے وزیراعلیٰ کے انتخاب کیلئے اسپیکر نے آج اجلاس بھی طلب کیا تھا جو ملتوی کردیا گیا۔ اسپیکر نے 30 نومبر کو دوبارہ اجلاس طلب کیا ہے۔
پارٹی پوزیشن کے مطابق 21 ممبران کا تعلق پاکستان تحریک انصاف(پی ٹی آئی) سے ہے جب کہ اسمبلی میں 1 خاتون اور 1 ٹیکنوکریٹ سمیت 4 ارکان کے ساتھ پیپلزپارٹی دوسری بڑی جماعت ہے۔
پی ٹی آئی کی اتحادی جماعت مجلس وحدت المسلمین کی 1جنرل نشست ہے جب کہ پی ٹی آئی سے معاہدے کے تحت ملنے والی خواتین کی 1 مخصوص نشست اور 1 ٹیکنوکریٹ سمیت اس کی نشستوں کی تعداد 3 ہے۔
مسلم لیگ ن کی بھی 2 جنرل اور خواتین کی 1 مخصوص نشست کے ساتھ کل نشستوں کی تعداد 3 ہے۔
اسمبلی میں جمعیت علمائے اسلام کی ایک نشست ہے جب کہ اپنی آزاد حیثیت کو برقرار رکھنے کا فیصلہ کرنے والا ایک آزاد رکن بھی اسمبلی کا حصہ ہے۔
