مائیک ٹائسن اور رائے جونز جونیئر کے درمیان 8 راؤنڈ کے بعد باکسنگ کا مقابلہ برابر ہونے پر میچ بے نتیجہ ختم ہو گیا۔
باکسنگ کے مایہ ناز کھلاڑی مائیک ٹائسن اپنی ریٹائرمنٹ کے 15 سال بعد باکسنگ مقابلے میں اترے تھے جس کیلئے امریکی ریاست کیلیفورنیا کے بڑے شہر لاس اینجلس میں میچ کھیلا گیا۔
دوسری جانب ان کے مد مقابل رائے جونز جونیئر کو باکسنگ کا فخر قرار دیا جاتا ہے، انہوں نے 2018 میں کینیڈین باکسر اسکاٹ سیگمون کے خلاف آخری میچ جیتا تھا۔
خیال رہے مائیک ٹائسن نے15 سال بعد جب دوبارہ رنگ میں اترنے کا اعلان کیا تو شائقین کیلئے کافی حیران کن تھا اور سوال اٹھائے جارہے تھے کہ رنگ سے اتنا عرصہ بار رہنے کے بعد کیا سابق چیمپئن اچھی کارکردگی کا مظاہرہ کر سکیں گے۔
یاد رہے روئے جونز جونیئر اور مائیک ٹائسن پہلی بار مد مقابل آئے تھے۔ ٹائسن کی عمر 54 برس جبکہ ان کے مد مقابل رائے جونز جونیئر 51 برس کے ہیں۔
واضح رہے مائیک ٹائسن اور رائے جونز کے درمیان ہفتے کی شب لاس اینجلس میں مقابلہ ہوا اس کے ہر راؤنڈ کا دورانیہ 2 منٹ تھا جب کہ عام طور پر 3 منٹ کا راؤنڈ ہوتا ہے۔
مقابلے کو دیکھنے کیلئے 50 ڈالر فی ٹکٹ مقرر کیے گئے تھے اور جمع شدہ رقم چھاتی کے سرطان اور انسانی اسمگلنگ روکنے کیلئے کام کرنے والی این جی اوز کو عطیہ کی جائے گی۔
میچ ختم ہونے کے بعد دونوں کھلاڑیوں کا کہنا تھا کہ میچ کا اصل مقصد ہی این جی اوز کو سپورٹ کرنا تھا جو در حقیقت انسانیت کی فلاح کیلئے کام کر رہی ہے۔
باکسنگ کے دو عظیم کھلاڑیوں کا مقابلہ دیکھنے کیلئے لوگوں کی بڑی تعداد موجود تھی، شائقین نے دونوں کھلاڑیوں کو خوب داد دیتے ہوئے کھیل کو پسند کیا۔
