پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے کارکنوں کی گرفتاری کے خلاف ردعمل دیتے ہوئے کہا ہے کہ انتظامیہ پی ڈی ایم کا جلسہ روکنے کے لیے اوچھے ہتھنکڈے استعمال کر رہی ہے مگر یہ جلسہ پیر کو لازمی کریں گے۔
ملتان میں پی ڈی ایم کے دیگر رہنماؤں کے ساتھ میڈیا سے گفتگو کرتے ہوئے مولانا فضل الرحمان کا کہنا تھا کہ ہم جنوری میں لانگ مارچ کرنا چاہتے ہیں مگر حکومت چاہتی ہے کہ ہم جلد لانگ مارچ کریں۔
انہوں نے کارکنوں سے کہا کہ وہ تمام رکاوٹیں توڑ کر جلسہ گاہ پہنچیں اور اگر پولیس ڈنڈا استعمال کرے تو کارکن بھی جواب میں ڈنڈا چلا سکتے ہیں۔
مولانا فضل الرحمان کا کہنا تھا کہ اگر جلسے کا رخ نہیں کر سکیں گے تو یاد رکھیں کہ جیلوں کا رخ کریں گے، بہادری کے ساتھ کریں گے اورجیلیں بھر دیں گے۔‘
انہوں نے کہا ملتان کی انتظامیہ کا رویہ حکومت کی منصوبہ بندی ہے۔ اس کے خلاف اگلے جمعے اور اتوار کو پورے ملک کے ضلعی ہیڈ کوارٹرز میں احتجاج کرنے کا اعلان کرتا ہوں۔
انہوں نے مزید دکہا کہ اگر کل ہمیں ملتان میں جلسہ نہ کرنے دیا گیا تو پاکستان کا ہر ضلع جلسہ گاہ ہوگا۔
مسلم لیگ ن کے رہنما رانا ثنااللہ کا کہنا تھا کہ کل مریم نواز ہر قیمت پر ملتان پہنچے گی اور تمام رکاٹیں توڑ کر پہنچے گی۔
پاکستان پیپلز پارٹی کے رہنما یوسف رضا گیلانی نے کہا کہ بلاول بھٹو زرداری اور سابق صدر آصف علی زرداری علیل ہیں، اس لیے آصفہ بھٹو جلسے سے خطاب کریں گی۔
