نائجیریا کے ایک فارم پر کام کرنے والے کسانوں پر بوکوحرام کے جنگجوؤں نے حملہ کر کے 43 کسانوں کو قتل کر دیا ہے جبکہ 6 کسان شدید زخمی ہیں۔
یہ واقعہ شمال مشرقی نائجیریا کے شہر میڈگری میں پیش آیا جہاں چاول کے کھیت میں کام کرنے والے کسانوں کو مسلح افراد نے پہلے باندھا اور پھر ان کے گلے کاٹ دیے۔
حکومت کا کہنا ہے کہ یہ کسان ایک ہزار کلومیٹر دور سے سفر کر کے مزدوری کے لیے آئے تھے۔
لاشیں دریافت کرنے والے سرکاری فوج کے ایک شخص کا کہنا ہے کہ 60 کسانوں کو چاولوں کے کھیت میں کام کرنے کے لیے مزدوری پر بلایا گیا تھا، ان میں سے 43 کی لاشیں مل چکی ہیں، 6 افراد شدید زخمی حالت میں اسپتال منتقل کر دیے گئے ہیں جبکہ باقیوں کو جنگجو یرغمال بنا کر ساتھ لے گئے ہیں۔
نائجیریا میں بوکوحرام کی دہشت گردی کا سلسلہ 2009 میں شروع ہوا، اس علاقے میں پہلے بھی کئی واقعات میں کسانوں کو قتل کیا گیا ہے مگر یہ سب سے بدترین واقعہ ہے۔
نائجیریا کے صدر کے ترجمان نے ایک ٹویٹ میں واقعہ کی مذمت کرتے ہوئے اسے دہشت گردی قرار دیا ہے، انہوں نے کہا کہ اس جنونی قتل و غارت پر پوری قوم افسردہ ہے۔
