پاکستان مسلم لیگ (ن) کی نائب صدر مریم نواز کے ملتان جانے والے قافلے میں حادثہ پیش آیا ہے جس میں وہ بال بال بچ گئی ہیں۔
اطلاعات کے مطابق قافلہ لاہور سے ملتان رواں دواں تھا جب ان سے اگلی گاڑی کا ٹائر پھٹ گیا، اس گاڑی میں نون لیگی ایم پی اے مرزا جاوید سوار تھے۔
مریم نواز کے قافلے میں سینکڑوں کی تعداد میں گاڑیاں موجود ہیں جو ان کے ہمراہ پی ڈی ایم کے جلسے میں شرکت کے لیے ملتان کی طرف جا رہی ہیں۔
حادثہ سمندری کے مقام پر پیش آیا جہاں دونوں گاڑیاں آپس میں ٹکرانے سے بال بال بچ گئیں۔
یاد رہے ملتان انتظامیہ کی جانب سے جلسے کی اجازت نا ملنے کے باوجود پی ڈی ایم کارکنان رکاوٹیں توڑ کر جلسہ گاہ میں داخل ہو گئے تھے۔
پی ڈی ایم کی جانب سے جلسے کے اعلان کے بعد انتظامیہ نے جلسہ کی اجازت نا دینے کا اعلان کیا تھا اور جلسہ گاہ کے راستوں میں رکاوٹیں کھڑی کر دی تھیں۔
پیپلزپارٹی کے رہنما علی موسیٰ گیلانی کی قیادت میں ریلی گھنٹہ گھر چوک پر پہنچی تھی جہاں مسلم لیگ (ن) کے کارکنان کی ایک بڑی تعداد اس ریلی شامل ہوئی، جس کے بعد شرکا جلسہ گاہ کی طرف پہنچیں، جہاں پولیس کی جانب سے انہیں روکنے کی کوشش کی گئی جس پر دونوں فریقین کے درمیان تلخ کلامی ہوئی۔
اس سے قبل پولیس کی جانب سے جاری بیان میں بتایا گیا تھا کہ پی ڈی ایم کی جماعتوں کے 200 سے زائد کارکنان کو گرفتار کیا گیا تھا جبکہ پیپلزپارٹی اور مسلم لیگ (ن) کے کارکنان کی فہرست بھی متعلقہ تھانوں کو فراہم کی گئی تھی۔
یاد رہے کہ پاکستان ڈیموکریٹک موومںٹ اب تک گوجرانوالہ، کراچی، کوئٹہ اور پشاور میں جلسے کرچکی ہے جبکہ 30 نومبر کو ملتان اور 13 دسمبر کو لاہور میں مزید دو جلسوں کا اعلان کیا گیا ہے۔
