پاکستان تحریک انصاف کی حکومت نے عوام کو کورونا ویکیسن مفت فراہم کرنے کا فیصلہ کیا ہے۔
حکومت نے کورونا ویکسین کی ایڈوانس بکنگ کیلئے 150 ملین ڈالر مختص کرنے کی منظوری بھی دے دی ہے۔
پارلیمانی سیکرٹری صحت نوشین حامد نے جیو نیوز کے پروگرام ‘جیوپاکستان’ میں گفتگو کرتے ہوئے کہا کہ کورونا ویکسین کیلئے حکومت فنڈ اکٹھا کر رہی ہے۔
انہوں نے کہا کہ 2021 کی دوسری سہ ماہی میں کورونا کے مریضوں کو ویکسین لگانا شروع کر دیں گے۔
ان کا کہنا تھا کہ کورونا ویکسین عوام کو مفت فراہم کی جائے گی۔
پارلیمانی سیکرٹری نے کہا کہ کورونا وبا کے شروع میں پورے ملک میں محض ایک لیبارٹری تھی تاہم اب 150 سے زائد لیبارٹریز ہیں، اسی طرح بیڈز اور وینٹی لیٹرز کی تعداد بھی بڑھائی گئی ہے۔
انہوں نے کہا کہ ملک بھر میں 2500 آکسیجن بیڈ کا اضافہ کیا گیا ہے مگر وینٹی لیٹرز سے آکسیجن بیڈ کی زیادہ ضرورت ہے۔
واضح رہے وفاقی کابینہ اور این سی او سی کے اجلاس میں کورونا ویکسین کی خریداری کو حتمی شکل دیتے ہوئے اس کیلئے رقم مختص کی گئی ہے۔
خیال رہے ملک میں کورونا کی دوسری لہر کے دوران ہلاکتوں اور کیسز میں تیزی سے اضافہ ہورہا ہے اور گزشتہ 24 گھنٹوں میں ریکارڈ 75 ہلاکتیں ہوئیں جو ساڑھے چار ماہ بعد ایک روز میں سب سے زیادہ ہلاکتیں ہیں۔
یاد رہے گزشتہ 24 گھنٹوں کے دوران ملک بھر میں کورونا کے 35197 ٹیسٹ کیے گئے جن میں 2829 افراد میں کورونا وائرس کی تصدیق ہوئی۔
پاکستان میں کورونا سے ہلاکتوں کی مجموعی تعداد 8166 ہوگئی ہے اور مجموعی کیسز 4 لاکھ 3311 تک جا پہنچے ہیں جب کہ فعال کیسز کی تعداد 49780 ہے۔
