پاکستان کی نوبل انعام یافتہ ملالہ یوسفزئی نے بھی ویڈیوشیئرنگ ایپ ٹک ٹاک میں اکاؤنٹ بنا لیا ہے اور پہلی ویڈیو شیئر کر دی ہے۔
انہوں نے پہلی ویڈیو میں اپنا تعارف کرایا اور پھر اپنی پسندیدہ چیزوں سے متعلق بتایا، اس ویڈیو کو انہوں نے انسٹاگرام پر بھی شیئر کیا ہے۔
ملالہ یوسفزئی نے ویڈیومیں اپنا تعارف کرواتے ہوئے کہا ہائے ٹک ٹاک میرا نام ملالہ یوسفزئی ہے، میں 23 سال کی ہوں اورلڑکیوں کی تعلیم کے حوالے سے کام کرتی ہوں۔
انہوں نے کہا کہ شاید آپ میں سے کچھ لوگ مجھے پہلے سے جانتے ہوں گے، شاید آپ میں سے کچھ لوگوں نے میری اقوام متحدہ میں کی گئی تقریر سنی ہو یا شاید کچھ لوگوں نے میری کتاب ’’آئی ایم ملالہ‘‘ پڑھی ہو۔
انہوں نے ویڈیو میں مزید کہا کہ ہوسکتا ہے آپ میں سے کچھ لوگ مجھے نہ جانتے ہوں تو میں یہاں خود کو متعارف کراؤں گی۔ میں نے حال ہی میں آکسفورڈ یونیورسٹی سے گریجویٹ کیا ہے۔ مجھے شوز اور کامیڈی پسند ہے اس کے علاوہ کتابیں پڑھنا بھی اچھا لگتا ہے۔ اس کے علاوہ میں گزشتہ 12 برس سے دنیا بھر کی لڑکیوں کی تعلیم اور محفوظ معیار تعلیم کے لیے سرگرم عمل ہوں۔
ملالہ نے اپنی ویڈیو میں ناظرین سے درخواست کی کہ وہ امریکہ میں فنڈ اکھٹا کرنے والی مہم ’’گیونگ ٹیوزڈے‘‘ میں چندہ دیں۔ اس کے علاوہ انہوں نے لوگوں سے ملالہ فنڈ کو سپورٹ کرنے کی بھی گزارش کی۔ ملالہ کی 56 سیکنڈ کے دورانیے کی اس ویڈیو کو ہزاروں لائیکس ملے۔
واضح رہے کہ ملالہ یوسفزئی نے رواں سال آکسفورڈ یونیورسٹی سے فلاسفی، سیاست اور اکنامکس میں گریجویشن کی ڈگری حاصل کی ہے۔ اور وہ ٹک ٹاک ایپ کو چیریٹی فنڈ میں عطیات دینےکی اپیل کے لیے استعمال کررہی ہیں۔
