پاک فوج کے شعبہ تعلقات عامہ (آئی ایس پی آر) کے سربراہ میجر جنرل بابر افتخار کا کہنا ہے کہ 5 اگست 2019 کے بعد بھارت کی عالمی سطح پر پوزیشن کمزور ہو گئی ہے، دنیا اب بھارتی حکومت کی حمایت سے جاری دہشت گردی پر کھل کر بات کر رہی ہے۔
اپنے ایک انٹرویو میں انہوں نے کہا ہے کہ بھارت افغان سرزمین کو استعمال کر کے سی پیک کو نشانہ بناتا ہے، وہاں کام کرنے والی چینیوں اور مقامی افراد کو نشانہ بناتا ہے، اس نے دہشت گرد اکٹھے کر لیے ہیں۔
ڈی جی آئی ایس پی آر کا کہنا تھا کہ ہم نے ان خطرات کے خلاف مکمل تیاری کر لی ہے، پاکستان نے سی پیک کی سیکیورٹی کے لیے خاص طور پر دو ڈویژن فورس تشکیل دی ہے، اس کے علاوہ آٹھ نو ریگولر رجمنٹس بھی راہداری کی حفاظت پر مامور ہیں۔
پاک فوج کے ترجمان میجر جنرل بابر افتخار نے مزید کہا کہ ہمارے چینی پارٹنرز ان انتظامات سے مطمئن ہیں، سی پیک کے خلاف تمام بھارتی سازشیں ناکام بنائیں گے اور یہ منصوبہ پہلے سے زیادہ ترقی کرے گا۔
انہوں نے بتایا کہ بھارت یہ فیصلہ کر چکا ہے کہ سی پیک کو مقررہ وقت میں مکمل نہ ہونے دیا جائے، اس کا خیال ہے کہ رکاوٹیں ڈالنے سے منصوبہ رک جائے گا، بھارت سی پیک کو ترقی کرتے نہیں دیکھنا چاہتا، اس کا مطلب واضح ہے کہ وہ کیا کر رہے ہیں۔
میجر جنرل بابر افتخار نے مزید کہا کہ بھارت افغان سر زمین کو استعمال کر کے سی پیک کو نشانہ بناتا ہے، افغان قیادت سے اس مسئلے پر بات کرتے رہتے ہیں، افغان حکومت کو درپیش مسائل کو تسلیم کرتے ہیں۔
