سابق صدر اور پاکستان پیپلزپارٹی کے شریک چیئرمین آصف علی زرداری نے نوازشریف کو مشورہ دیا ہے کہ وہ وطن واپس آ جائیں۔
بول ٹی وی کے مطابق آصف علی زرداری نے میاں نوازشریف سے ٹیلی فونک رابطہ کیا جس میں انہوں نے وطن واپسی کا مشورہ دیتے ہوئے کہا ہے کہ پی ڈی ایم تحریک کی کامیابی میاں نوازشریف کی واپسی سے مشروط ہے اور ان کو ملک میں رہ کر حالات کا سامنا کرنا ہو گا۔
اس موقع پر میاں نوازشریف نے کہا کہ ان کی واپسی کا فیصلہ اہل خانہ اور پارٹی رہنما کریں گے ، یہ معاملہ میں نے ان پر چھوڑ دیا ہے۔
واضح رہے کہ اس سے قبل بھی کئی تجزیہ کاروں نے پی ڈی ایم کی تحریک کی کامیابی کو نوازشریف کی واپسی سے مشروط کیا ہے۔
دوسری جانب حکومت پاکستان نے برطانیہ پر بہت دباؤ ڈالا ہوا ہے کہ وہ سابق وزیراعظم کو پاکستان کے حوالے کریں کیونکہ وہ علاج کے لیے لندن گئے تھے اور پھر واپس نہیں آئے۔
حکومت پاکستان کا موقف ہے کہ نوازشریف کو عدالتوں نے سزا سنائی ہے، انہیں واپس آ کر اپنی سزا مکمل کرنی چاہیئے۔
وزیراعظم عمران خان بھی ایک تقریر میں کہہ چکے ہیں کہ وہ نوازشریف کو وطن واپس لانے کے لیے برطانوی وزیراعظم بورس جانسن سے بات کریں گے۔
