چین چاند پر اپنا جھنڈا گاڑنے میں کامیاب ہو گیا، چینی اسپیس سینٹر کی جانب سے اس کی تصاویر جاری کر دی گئیں۔
کچھ عرصہ قبل چین نے چاند سے نمونے اکٹھے کرنے کیلئے خلائی مشن چاند پر بھیجا تھا، جس نے سطح چاند پر چینی پرچم لہرا دیا۔
چین کی قومی خلائی انتظامیہ نے آج اس کی تصاویر جاری کی ہیں، جس میں چانگ 5 نامی خلائی گاڑی کو چینی قومی پرچم پر لہراتے ہوئے دکھایا گیا ہے۔
واضح رہے چین نے اس بار خالص کپڑے سے بنا ہوا جھنڈا چاند پر بھیجا ہے۔
پرچم لہرانے کی تصاویر پینورامک کیمرے سے لی گئی ہیں، جو خلائی گاڑی پر نصب تھا، یہ خلائی گاڑی جمعرات کو چاند سے نمونے لے کر واپس ہوئی تھی۔
چین کا چانگ فائیو تحقیقات مشن 24 نومبر کو لانچ کیا گیا تھا اور یکم دسمبر کو یہ خلائی گاڑی چاند پر اوشین آف اسٹارمز کے شمال میں اتری تھی۔
گزشتہ روز اس نے چاند پر مٹی کے نمونے اور پتھر جمع کرنے کا کام مکمل کیا اور واپسی کے لیے اڑان بھری۔
چانگ فائیو نے دو طریقوں کی مدد سے نمونے اکٹھے کئے، جن میں سے پہلا آسان اور سادہ تھا جبکہ دوسرے میں روبوٹ نے اپنے بازوؤں کی مدد سے وہاں پر ڈرلنگ کی اور پھر نمونے حاصل کئے۔
چینی اسپیس سینٹر کی طرف سے جاری کی گئی رپورٹ میں کہا گیا ہے کہ خلائی گاڑی نے چاند کی دو کلومیٹر گہرائی سے نمونے حاصل کئے اور ڈیٹا مانیٹرنگ میں بیٹھے ماہرین کو بھیجے۔
چانگ 5 مشن کو چینی خلائی تاریخ کا سب سے پیچیدہ اور چیلنجنگ مشن سمجھا جاتا ہے اور یہ گزشتہ 40 سالوں میں چاند سے نمونے لانے والا دنیا کا پہلا مشن ہے۔
