سری لنکا پریمئیر لیگ میں پاکستان کے فاسٹ بالر محمد عامر اور افغان بالر نوین الحق کے درمیان ہونے والے جھگڑے کی بازگشت اب بھی سنائی دے رہی ہے۔
محمد عامر نے پہلی بار بتایا ہے کہ دونوں کے درمیان کیا واقعہ پیش آیا، ان کا کہنا ہے کہ نوین الحق نے بالنگ کے دوران مجھے اکسانے کی کوشش کی۔
انہوں نے کہا کہ افغان بالر نے مجھے غدار کہا اور یہ بھی کہا کہ مجھے 5 برس کے لیے جیل جانا چاہیے تھا۔ میں نے اس کے ساتھ کوئی بدتمیزی نہیں کی۔
محمد عامر نے بتایا کہ انہوں نے نوین الحق یا افغانستان کے متعلق کوئی منفی بات نہیں کی تھی، وہ غلط بیانی کر رہا ہے۔
یاد رہے کہ سری لنکا میں ہونے والی لنکا پریمئیر لیگ (ایل پی ایل) میں ہونے والے ایک میچ کے دوران پاکستانی بالر محمد عامر اور افغانستان کے فاسٹ بالر نوین الحق کے درمیان تلخ کلامی ہو گئی تھی۔
کینڈی ٹسکرز کے نوین الحق کی گیند پر محمد عامر نے چوکا لگایا تو انہیں غصہ آ گیا اور انہوں نے عامر کو برا بھلا کہنا شروع کر دیا۔ محمد عامر نے بھی ترکی بہ ترکی جواب دیا۔
نوین الحق کے اگلے اوور میں محمد عامر نے ان کی ایک اور گیند پر چھکا لگا دیا، میچ ختم ہونے کے بعد بھی دونوں کے درمیان تلخ کلامی جاری رہی۔
میچ ختم ہونے کے بعد شاہد آفریدی بھی اس معاملے میں شریک ہو گئے، انہوں نے افغان بولر نوین الحق پر اپنے غصے کا اظہار کیا اور انہیں آنکھیں دکھائیں۔
شاہد آفریدی نے افغان بالر پر غصہ کرتے ہوئے انہیں معاملہ حل کرنے کا کہا۔
