میمو اسکینڈل کیس کی دوبارہ سماعت کے لیے سپریم کورٹ میں درخواست دائر کر دی گئی ہے۔ درخواست شہری شاہد اورکزئی کی جانب سے دائر کی گئی ہے۔
درخواست گزار نے کہا ہے کہ سی آئی اے نے انتہائی ہوشیاری سے حسین حقانی کو تحفظ فراہم کیا جبکہ 9 رکنی لارجر بینچ نے انہیں ملک سے باہر جانے کی اجازت دی۔
درخواست میں کہا گیا ہے کہ حسین حقانی کی مرحومہ وکیل عاصمہ جہانگیر پس پردہ سازش سے ناواقف تھیں، مرحومہ وکیل اس حقیقت سے واقف تھیں کہ حسین حقانی نے مائک مولن کو مراسلہ لکھا۔
درخواست میں ایبٹ آباد آپریشن کے واقعات بیان کرتے ہوئے اسے ناکام آپریشن قرار دینے کی بھی استدعا کی گئی ہے۔
سپریم کورٹ میں دائر درخواست میں استدعا کی گئی ہے کہ ملکی سلامتی کے تناظر میں میمو کیس کی سماعت مکمل کر کے فیصلہ سنایا جائے۔
