بھارت میں تیار ہونے والی مقامی ویکسین کی خوراک لینے کے باوجود ریاست ہریانہ کے وزیر داخلہ کورونا کا شکار ہو گئے ہیں۔
اس وقت دنیا بھر میں مختلف ممالک کورونا ویکسین تیار کرنے میں مصروف ہیں، زیادہ تر اس وقت حتمی مراحل میں ہیں جن میں بڑی تعداد میں رضاکاروں کو ویکسین فراہم کر کے اس کے نتائج کا جائزہ لیا جا رہا ہے۔
بھارت بھی اس دوڑ میں شامل ہے اور بائیوٹیک ، آئی سی ایم آر کے ساتھ مل کر ‘کوویکسن’ کے نام سے ویکسین تیار کر رہا ہے جس کی کی جانچ کا عمل تیسرے مرحلہ میں پہنچ چکا ہے۔
اس حوالے سے بڑی تعداد میں مختلف علاقوں اور نسلوں کے لوگوں کو ویکسین لگائی جا رہی ہے تاکہ اس کے محفوظ اور موثر ہونے کے متعلق حتمی علم ہو سکے۔
بھارتی میڈیا کا کہنا ہے کہ ہریانہ کے وزیرداخلہ انل وج نے 20 نومبر کو دیسی ویکسین کا پہلا ٹیکہ لگایا گیا لیکن دوسرے ٹیکے کی نوبت آنے سے قبل ہی ان کا کورونا ٹیسٹ مثبت آ گیا۔
انل وج نے ٹوئٹر پر بتایا ہے کہ وہ کورونا وائرس سے متاثر پائے گئے ہیں، انہوں نے اپیل کرتے ہوئے کہا کہ وہ سب لوگ جو ان سے رابطے میں آئے ہیں، وہ خود کورونا ٹیسٹ کرا لیں ۔
