معاون خصوصی وزیراعلیٰ پنجاب فردوس عاشق اعوان نے مارشل آرٹس کا مظاہرہ کرتے ہوئے مکا مار کر کئی ٹائلیں توڑ دیں، ان کی ویڈیو سوشل میڈیا پر وائرل ہو گئی۔
نجی ٹی وی کے مطابق لاہور میں خصوصی بچوں کے حوالے سے تقریب تھی جس میں مارشل آرٹس کا مظاہرہ کیا جا رہا تھا، معاون خصوصی نے بھی ایک ہی مکے سے 8 ٹائلیں توڑ دیں اور خوشی کااظہار کیا۔
فردوس عاشق اعوان نے ازراہ مزاح کہا کہ میں نے یہ مکا پی ڈی ایم کے منہ پر مارا ہے ، ان کا کہنا تھا کہ یہ مکا پی ڈی ایم کا منہ سامنے رکھ کر مارا اور سب نے دیکھا کہ ایک بھی ٹائل سلامت نہیں رہی اور سب کرچی کرچی ہو گئیں۔
فردوس عاشق اعوان نے کہا کہ پی ڈی ایم روز عمران خان اور حکومت کو مکے مار رہی ہے ایک ہمارا بھی سہی۔
انہوں نے کہا کہ مریم نواز روز کہتی ہیں کہ حکومت گھر جا رہی ہے، حقیقت یہ ہے کہ مریم نواز ضمانت پر ہیں اور ضمانت خارج ہونے کے بعد وہ جیل جا رہی ہیں۔
اس سے قبل فردوس عاشق اعوان کی ایک اور ویڈیو بھی سوشل میڈیا پر وائرل ہوئی تھی جس میں انہوں نے ایک فٹ بال کو کک لگائی تھی۔
اس ویڈیو پر صارفین نے اپنی تخلیقی صلاحیتوں کا مظاہرہ کرتے ہوئے بہت سی دلچسپ میمز بھی بنائی تھیں اور مزاحیہ تبصرے کیے تھے۔
