مسلم لیگ ن کی رہنما مریم نواز نے کہا ہے کہ حکومت لاہور کے جلسے سے خوف زدہ ہے۔
مسلم لیگ ن کے سوشل میڈیا کنونشن سے خطاب کرتے ہوئے مریم نواز کا کہنا تھا کہ سوشل میڈیا ونگ کی ذمہ داری جب انہیں سونپی گئی تو اس وقت یہ محدود تھا لیکن آج پاکستان کی سیاسی جماعتوں میں ایک مضبوط نیٹ ورک کی حیثیت اختیار کر چکا ہے۔
مریم نواز نے کہا کہ یہ جاننا ضروری ہے کہ ملک میں آج جو ہو رہا ہے وہ کیوں ہو رہا ہے اور کون کر رہا ہے؟
انہوں نے کہا کہ نااہل اور سلیکٹڈ حکومت ہمارے سروں پر مسلط ہے لیکن اس حکومت کی گاڑی نہیں چل رہی ہے، ایک صفحے پر ہونے کے باوجود گاڑی کو دھکا لگایا جا رہا ہے۔
ان کا کہنا تھا کہ سردیوں کا آغاز ہوتے ہی گیس غائب ہو گئی ہے لیکن صارفین کو ہزاروں کا بل باقاعدہ ادا کرنا پڑ رہا ہے۔
مریم نواز نے عمران خان کا نام لیے بغیر طنز کیا کہ کون کہتا تھا میں سبز پاسپورٹ کی عزت کراؤں گا، آج مختلف ممالک میں پاکستانی پاسپورٹ پر پابندی ہے۔
انہوں نے کہا کہ نواز شریف نے ملک سے دہشت گردی کے خاتمے کیلئے ضرب عضب اور ردالفساد کے نام سے دو جنگیں لڑیں، جن کے نتیجے میں ملک میں امن قائم ہوا، نوازشریف نے یہ سارے اقدامات اپنی جان کو ہتھیلی پر رکھ کر کیے۔
اس موقع پر مریم نواز نے کہا کہ آج میڈیا سے بھی درخواست کرتے ہیں کہ آخر کب تک حق سچ بولنے کیلئے مجبور رہیں گے۔
مریم نواز نے جسٹس وقار سیٹھ کی بہادری کو سلام پیش کرتے ہوئے کہا کہ سابق دو چیف جسٹس کو کس طرح یاد کیا جا رہا ہے، ہم چاہتے ہیں کہ پاکستان میں انصاف کا بول بالا ہو اور فیصلے انتقام کی بنیاد پر نہ ہوں۔
انہوں کہا کہ پاکستان کے عوام یہ جنگ جیت چکے ہیں، جس کا 13 دسمبر کواعلان ہونا باقی ہے۔
ان کا کہنا تھا کہ پی ڈی ایم 8 دسمبر کو بڑے فیصلے کرنے جا رہی ہے، اگر اسمبلی سے استعفوں کا فیصلہ ہوا تو تمام منتخب اراکین اس پر عمل کریں، اگر کوئی رکن دباؤ میں آیا تو عوام اس کا گھیراؤ کریں گے۔
