کورونا ایس او پیز کی خلاف ورزی پر مسلم لیگ ن کے ورکرز کنونشن میں شریک ہونے والے ڈھائی ہزار کارکنوں کے خلاف پولیس نے مقدمہ درج کر لیا۔
مسلم لیگ ن کے کارکنوں کے خلاف مقدمہ پولیس کانسٹیبل حسنین کی مدعیت میں درج کیا گیا ہے جو اس تقریب کی سیکیورٹی پر مامور تھے۔
کانسٹیبل کا اپنی درخواست میں کہنا تھا کہ جمعہ کے روز مسلم لیگ ن کی تقریب کریسنٹ گراؤنڈ میں منعقد ہوئی جس میں دو سے ڈھائی ہزار افراد شریک ہوئے۔
درخواست گزار نے مؤقف اختیار کیا کہ شرکا نے کووڈ 19 ایس او پیز کے خلاف ورزی کی جو حکومت پنجاب کی ہدایت کی خلاف ورزی تھی۔
مذکورہ کنونشن سے پارٹی کے سینئر رہنماؤں جن میں سابق وزیر اعظم شاہد خاقان عباسی، احسن اقبال اور رانا ثناءاللہ سمیت دیگر نے خطاب کیا تاہم کسی رہنما کو مقدمے میں نامزد نہیں کیا گیا۔
نامعلوم افراد کے خلاف مقدمہ پاکستان پینل کو ڈ(پی پی سی) کی دفعہ 148 اور 149 اور ٌنجاب انفیکشیس ڈیزیز (پریوینش اینڈ کنٹرول) آرڈی یننس 2020 کے تحت درج کیا گیا ہے۔
خیال رہے گزشتہ ماہ کے اوائل میں بھی مسلم لیگ ن سے تعلق رکھنے والے رکن صوبائی اسمبلی خواجہ عمران نذیر کی گرفتاری کے بعد تھانے پہنچنے والے پارٹی کے دیگر رہنماؤں کے خلاف ایس او پیز کی خلاف ورزی کا مقدمہ درج کیا گیا تھا۔
ایف آئی آر اسٹیشن ہاؤس افسر (ایس ایچ او) کی درخواست پر درج کی گئی تھی جس میں مسلم لیگ ن کے 21 رہنماؤں کو نامزد جبکہ 40 نامعلوم کارکنان کا ذکر کیا گیا تھا۔
لیکن مسلم لیگ کے رہنماؤں کی طرف سے متعلقہ تھانے جانے کے بعد ایف آئی آر کو خارج کر دیا گیا تھا۔
