پاکستان کی معروف اداکارہ زینب جمیل نے انسٹا گرام پر ایک پوسٹ میں لکھا کہ میں فخر سے اس بات کا اعلان کر رہی ہوں کہ میں بطور اداکارہ و ماڈل اپنا کیریئر جاری نہیں رکھوں گی۔
اداکارہ کا کہنا تھا کہ الحمدللہ ، اللہ پاک نے مجھے قرآن و حدیث کی تعلیم حاصل کرنے کا شرف بخشا ہے۔
انہوں نے کہا کہ میں اب دین اسلام کی زیادہ سے زیادہ تعلیم حاصل کروں گی۔
اداکارہ زینب جمیل نے نجی چینل سے بطور اینکر اپنے کیریئر کا آغاز کیا تھا اور کچھ عرصے بعد وہ ایک انٹرٹینمنٹ چینل پر وی جے کے طور پر کام کر رہی تھیں۔
انہوں نے اس کے بعد کئی ڈراموں میں اداکاری بھی کی، زینب جمیل نے سدا سکھی رہو، سسرال میری بہن کا، مل کے بھی ہم نہ ملے، منچلی اور آپ کی کنیز جیسے ڈرموں میں اداکاری کی ہے۔
یاد رہے ان سے قبل پاکستانی معروف ماڈل و اداکارہ انعم ملک نے بھی مذہب کی خاطر شوبز کو خیرباد کہنے کا اعلان کیا تھا۔
زینب جمیل کے علاوہ شوبز سے وابستہ دیگر شخصیات کی جانب سے بھی ماضی میں مذہب کی خاطر ایسے اعلانات سامنے آ چکے ہیں۔
پاکستان کے معروف اداکار حمزہ علی عباسی نے نومبر 2019 میں شوبز سے کنارہ کشی اختیار کر لی تھی لیکن انہوں رواں برس ستمبر میں محض ایک سال سے بھی کم عرصے بعد واپسی کا عندیہ دیا تھا۔
اسی طرح گزشتہ نومبر میں گلوکارہ و اداکارہ رابی پیرزادہ نے اپنی ویڈیو لیک ہونے اور لوگوں کے تلخ رویوں کے بعد شوبز چھوڑنے کا اعلان کیا تھا۔
رواں برس مارچ میں معروف اداکار فیروز خان نے بھی شوبز سے کنارہ کشی اختیار کرکے اسلامی تعلیمات کے مطابق زندگی گزارنے کا اعلان کرکے سب کو حیران کر دیا تھا۔
