اسلام آباد ہائیکورٹ نے بڑا فیصلہ دیتے ہوئے کہا ہے کہ مشیر خزانہ عبدالحفیظ شیخ کابینہ کمیٹی کی سربراہی کے اہل نہیں ہو سکتے۔
عدالت نے 25 اپریل 2019ء کا نوٹی فیکیشن بھی کالعدم قرار دیتے ہوئے کابینہ کمیٹی برائے نجکاری کی تشکیل غیر قانونی قرار دیدی ہے۔
اسلام آباد ہائیکورٹ نے کابینہ کمیٹی کی تشکیل کے خلاف مسلم لیگ (ن) کی درخواست منظور کر لی ہے۔ اس کے علاوہ عدالت نے تمام متعلقہ مشیروں کی کمیٹی میں شمولیت غیر قانونی قرار دیدی ہے۔
عدالت کے حکم کی زد میں ادارہ جاتی اصلاحات کی مشیر عشرت حسین اور مشیر کامرس وسرمایہ کاری عبدالزراق داؤد بھی آ گئے ہیں جن کی شمولیت بھی غیر قانونی قرار دے دی گئی ہے۔
عامر فاروق کی سربراہی میں ہائیکورٹ کے دو رکنی بینچ نے محفوظ فیصلہ سنایا۔
مسلم لیگ ن کے رکن قومی اسمبلی رانا ارادت نے وکیل محسن شاہنواز رانجھا کے ذریعے درخواست دائر کر کے کابینہ کی کمیٹی برائے نجکاری کی تشکیل کو چیلنج کیا تھا۔
