پاکستان کے معروف صنعتکار اور کراچی کی توانا آواز سراج قاسم تیلی دبئی میں انتقال کر گئے ہیں۔
وہ چیئرمین بزنس مین گروپ کے چیئرمین تھے اور کراچی ایوان صنعت و تجارت کے صدر بھی رہے تھے۔
خاندانی ذرائع نے ان کی موت کی تصدیق کرتے ہوئے بتایا کہ وہ دبئی گئے ہوئے تھے جہاں انہیں نمونیا ہو گیا اور آج وہ انتقال کر گئے۔
قاسم سراج تیلی ملک کی معاشی سرگرمیوں میں ہمیشہ بڑھ چڑھ کر حصہ لیتے تھے اور انہیں خدمات پر انہیں حکومت پاکستان کی جانب سے ستارہ امتیاز سے بھی نوازا گیا تھا۔
کراچی کے معاشی سرگرمیوں کی بحالی اور انفرااسٹرکچر کی بہتری کے لیے آواز اٹھانے والوں میں سراج قاسم تیلی ہمیشہ سرگرم عمل رہتے تھے۔
ان کی وفات پر کراچی ایوان صنعت و تجارت کے صدر شارق وہرہ نے نجی ٹی وی چینل جیو نیوز سے گفتگو میں کہا کہ سراج قاسم تیلی اس ملک کا اثاثہ تھے اور وہ صرف کراچی نہیں پورے پاکستان کی تاجر برادری کے لیڈر تھے۔
انہوں نے کہا کہ سراج قاسم تیلی نے اپنی پوری زندگی تاجر برادری کے لیے وقف کی اور انہوں نے 23 سال کراچی ایوان صنعت و تجارت کو دیے اور اسے پاکستان اور دنیا کا نامور چیمبر بنانے میں مدد کی۔
شارق وہرہ کا کہنا تھا کہ پوری تاجر برادری اس وقت سوگوار ہے، ایسے بہادر لیڈر بہت کم ہوتے ہیں، ہمیں بالکل یقین نہیں آرہا کہ سراج قاسم تیلی ہمیں چھوڑ کر چلے گئے ہیں۔
