دنیا میں سب سے مہنگا اور سب سے سستا پیٹرول کہاں ملتا ہے؟

دنیا بھر میں پیٹرول اور ڈیزل کی قیمتوں کو اس ملک میں مہنگائی کا معیار سمجھا جاتا ہے۔ کسی بھی ملک میں ان مصنوعات کا مہنگائی کے ساتھ براہ راست تعلق ہوتا ہے۔ 

دنیا میں کئی ایسے ممالک ہیں جن میں پاکستان بھی شامل ہے جہاں پیٹرول کی قیمتوں کا دو ہفتوں بعد یا ماہانہ کی بنیادوں پر جائزہ لیا جاتا ہے۔

اسی طرح کئی ایسے ممالک بھی ہیں جہاں پیٹرولیم مصنوعات کے داموں کا جائزہ روزانہ کی بنیاد پر لیا جاتا ہے۔ بھارت ایسے ممالک کی ایک مثال ہے۔

فی الوقت پاکستان میں پیٹرول کی قیمت 100.69 روپے مقرر کی گئی ہے جب کہ ڈیزل 105.43 روپے میں فروخت کیا جارہا ہے۔ دنیا بھر میں پیٹرول کی پاکستانی روپے میں اوسط قیمت 162 روپے 30 پیسے ہے۔

مندرجہ ذیل اعداد و شمار 30 نومبر تک کے ہیں اور تمام قیمتیں پاکستانی روپے میں پیش کی گئی ہیں۔

دنیا میں اس وقت سب سے مہنگا پیٹرول ہانگ کانگ میں بیچا جا رہا ہے جہاں اس کی فی لیٹر قیمت 364 روپے 85 پیسے ہے۔ ماہرین کے مطابق اس کی وجہ پیٹرول اسٹیشن تعمیر کرنے کے لیے زمین کی خریداری پر بڑا خرچہ آنا ہے۔

اس کا اندازہ یہاں سے لگایا جا سکتا ہے کہ ہانگ کانگ میں پیٹرول اسٹیشن تعمیر کرنے کے لیے زمین کی قیمتوں میں گزشتہ صدی میں 400 فیصد اضافہ ہوا ہے۔

فہرست میں دوسرا نمبر ملک شام کا ہے جبکہ سینٹرل افریقن ریپبلک تیسرے پر ہے جہاں پیٹرول کی فی لیٹر قیمتیں 326 روپے اور 320 روپے 42 پیسے بالترتیب ہیں۔

 اگر ایسے ممالک کو زیر بحث لایا جائے جہاں پیٹرول سستا ہے تو سرفہرست وینزویلا ہے جہاں اس کی قیمت 3 روپے 20 پیسے فی لیٹر ہے۔ اس فہرست میں دوسرا نمبر ایران کا ہے جہاں پیٹرول 9 روپے 22 پیسے میں فروخت کیا جارہا ہے۔ تیسرا نمبر افریقی ملک انگولا کا ہے جہاں پیٹرول 39 روپے میں بیچا جارہا ہے۔