پاکستان ڈیموکریٹک موومنٹ (پی ڈی ایم) کے جاری اجلاس میں سابق وزیراعظم نواز شریف نے تجویز پیش کی ہے کہ تمام جماعتیں اپنے ارکان اسمبلی کے استعفے اپوزیشن اتحاد کے سربراہ مولانا فضل الرحمان کے حوالے کر دیں۔
اسلام آباد میں پی ڈی ایم کا اجلاس جاری ہے جس میں نواز شریف اور سابق صدر آصف علی زرداری بذریعہ ویڈیو لنک موجود ہیں
ان کے علاوہ پاکستان پیپلزپارٹی کے چیئرمین بلاول بھٹو زرداری، مسلم لیگ (ن) کی نائب صدر مریم نواز، شاہد خاقان عباسی اور دیگر جماعتوں کے سربراہ اجلاس میں شامل ہیں۔
اجلاس میں مختلف تجاویز سامنے آ رہی ہیں جن میں اسمبلیوں سے استعفوں کے ساتھ ساتھ تحریک عدم اعتماد اور اسلام آباد کی جانب لانگ مارچ شامل ہے۔
ذرائع کے مطابق اجلاس کے دوران آصف زرداری نے نواز شریف سے مخاطب ہو کر پوچھا کہ کیا آپ نے کمرے میں بھی ماسک پہنا ہوا ہے؟
اس پر نوازشریف نے ہنستے ہوئے جواب دیا کہ ماسک فیشن میں پہنا ہے، ان کے اس جواب پر پی ڈی ایم کے شرکاء کے قہقہوں سے کمرہ گونج اٹھا۔
ذرائع کے مطابق مریم نواز نے آصف علی زرداری کو بختاور کی منگنی پر مبارکباد دی، آصف زرداری اور نوازشریف نے اسلام آباد کے موسم کا احوال پو چھا۔
اس کے علاوہ ایک اہم پیشرفت یہ دیکھنے میں آئی ہے کہ لاہور اور سرگودھا سے مسلم لیگ (ن) کے 5 ارکان قومی اسمبلی نے ایڈوانس میں استعفے پارٹی قیادت کو بھجوادیے ہیں۔
یاد رہے کہ مریم نواز نے اپنے ایک خطاب میں متوقع طور پر استعفے نہ دینے والے اراکین اسمبلی کو دھمکی دی تھی کہ لوگ ان کے گھروں کا گھیراؤ کریں گے۔
