پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ اپوزیشن اراکین اسمبلی 31 دسمبر تک پارٹی قائدین کے پاس استعفے جمع کرائیں گے۔ اس میں قومی و صوبائی اراکین اسمبلی شامل ہوں گے۔
پی ڈی ایم کے سربراہی اجلاس کے بعد پریس کانفرنس سے خطاب کرتے ہوئے انہوں نے بتایا کہ بدھ کو پی ڈی ایم کی اسٹیرنگ کمیٹی کا اجلاس ہو گا جس میں شٹر ڈاؤن ہڑتال اور لانگ مارچ کی تاریخ کا اعلان کیا جائے گا۔
انہوں نے کہا کہ وزیراعظم عمران خان ہم سے ڈائیلاگ کی درخواست کر رہے ہیں، ہم اس درخواست کو مسترد کرتے ہیں، وہ اس قابل نہیں کہ ان سے مذاکرات کیے جائیں۔
مولانا فضل الرحمان نے کہا کہ حکومتی اقتدار کی کرسی ہل چکی ہے، اسے ایک دھکا دینے کی ضرورت ہے۔
اسٹیبلشمنٹ کے متعلق ایک سوال کے جواب میں انہوں نے کہا کہ ہماری تحریک دھاندلی سمیت پورے نظام کے خلاف ہے، دھاندلی کرنے والے خود سوچیں کہ ان کا انجام کیا ہو گا۔
