جنوبی افریقہ کی کرکٹ ٹیم کی جانب سے 26 جنوری سے 14 فروری تک کرکٹ سیریز کے لیے دورہ پاکستان کا اعلان کیا گیا ہے۔
سیریز میں 2 ٹیسٹ میچ اور 3 ٹی ٹوئنٹی میچز کھیلے جائیں گے۔ جنوبی افریقہ کی کرکٹ ٹیم کے اس دورے میں پاکستان کو انہیں 14 سال میں پہلی مرتبہ خوش آمدید کہنے کا موقع ملے گا۔
جنوبی افریقہ نے آخری دورہ پاکستان 2007 میں کیا تھا جس میں 2 ٹیسٹ میچ اور 5 ون ڈے کھیلے گئے تھے۔ اس ٹیسٹ سیریز میں مہمان کرکٹ ٹیم نے 1۔0 سے پاکستانی کرکٹ ٹیم کو شکست دی تھی۔ اس سیریز کا دوسرا ٹیسٹ پاکستانی کرکٹر انضمام الحق کا آخری ٹیسٹ تھا۔
جنوبی افریقہ کرکٹ کی جانب سے دیے گئے بیان میں کہا گیا ہے کہ ان کے دورہ پاکستان میں دو ٹیسٹ میچز جبکہ تین ٹی ٹوئنٹی میچز کھیلے جائیں گے۔ جنوبی افریقہ کے کرکٹ ڈائیرکٹر گریم سمتھ نے کہا ہے کہ اتنے ممالک کو پاکستان جیسے کرکٹ سے محبت کرنے والے ملک میں واپسی کرتا دیکھنا ایک خوشگوار بات ہے۔ انہوں نے مزید کہا کہ جنوبی افریقہ کی ٹیم کا ان ممالک میں شامل ہونا باعث خوشی ہے۔
پاکستان اور جنوبی افریقہ کے درمیان 2 ٹیسٹ میچ کراچی اور راولپنڈی میں کھیلے جائیں گے۔ پہلا ٹیسٹ 26 جنوری سے 30 جنوری تک جبکہ دوسرا ٹیسٹ 4 فروری سے 8 فروری تک کھیلا جائے گا۔ جبکہ تینوں ٹی ٹوئنٹی گیمز لاہور میں کھیلی جائیں گی۔ یہ ٹی ٹوئنٹی سیریز پاکستان میں جنوبی افریقہ کی پہلی ٹی ٹوئنٹی سیریز ہو گی۔
پریکٹس میچز کھیلنے سے قبل جنوبی افریقہ کی کرکٹ ٹیم ایک خاص مدت تک قرنطینہ میں رہے گی۔ جنوبی افریقہ اس دورہ کے بعد پچھلے 15 مہینوں میں دورہ پاکستان کرنے والی چوتھی ٹیم ہوگی۔ اس سے پہلے سری لنکا، بنگلادیش اور زمبابوے پاکستان کا دورہ کر چکی ہیں۔
