مسلم لیگ (ن) کی نائب صدر مریم نواز اور چیئرمین پیپلزپارٹی بلاول بھٹو زرداری نے کہا ہے کہ عمران خان پہلے دھمکیاں دیتے تھے اور اب وہ کہتے ہیں کہ بات چیت کیلئے تیار ہوں لیکن ان سے کوئی بات نہیں ہو گی۔
دونوں رہنماؤں نے جاتی امرا میں ملاقات کے بعد میڈیا سے بات کی، بلاول بھٹو زرداری کا کہنا تھا کہ پی ڈی ایم کے قیام کے وقت سے اس میں دراڑ پیدا ہونے اور توڑنے کے خواب دیکھے جارہے ہیں، 13 دسمبر سے پہلے پی ڈی ایم قیادت کے پاس استعفے جمع ہوں گے، حکومت کی پریشانی سب کے سامنے ہے۔
انہوں نے کہا کہ عمران خان کا بیانیہ ہر روز بدل جاتا ہے، پہلے دھمکیاں دیتا تھا اب بات چیت کیلئے تیار ہے اور این آر او مانگ رہاہے، لیکن کٹھ پتلی حکومت سے بات چیت کا وقت گزرگیا۔
چیئرمین پیپلزپارٹی کا کہنا تھا کہ کٹھ پتلی حکمران خود بخود گھر چلا جائے تو اچھا ہے، حکومت اور اس کی سہولت کار اسٹیبلشمنٹ کو گھر بھیجنا ہے، سیلیکٹرز کا نام کھل کے اس لیے نہیں لیا کہ ہم ان کا مان رکھتے ہیں۔
انہوں نے کہا کہ پی ڈی ایم کی تحریک تیزی اور کامیابی سے آگے جا رہی ہے۔ پی ڈی ایم کے قیام کے وقت سے دراڑ پیدا کرنے کے خواب دیکھےجارہے ہیں۔
اس موقع پر مریم نواز کا کہنا تھا کہ حکومتی وزراء تین روز سے ن لیگ کی سینئر قیادت سے رابطے کررہے ہیں لیکن ان کی بات سننے میں دلچسپی نہیں ہے۔
انہوں نے کہا کہ عمران خان خدائی لہجے میں کہتا تھا این آر او نہیں دوں گا اب بات چیت کے لیے تیار ہے اور پی ڈی ایم سے این آر او مانگ رہا ہے، سلیکٹڈ کو کہتے ہیں راستے سے ہٹ جاؤ۔
مریم نواز نے کہا کہ حکومتی وزرا ذہنی پستی کا شکار ہیں، کٹھ پتلی حکمران کو حکومت جاتے دیکھ کر بات چیت اور پارلیمنٹ یاد آگئی ہے۔
