مسلم لیگ (ن) کی نائب صدر مریم نواز نے کہا ہے کہ آج ظہرانے کے بعد استعفے، لانگ مارچ اور احتجاج کا حتمی فیصلہ کریں گے۔
مریم نواز نے سماجی رابطے کی ویب سائٹ ٹوئٹر پر بتایا کہ میں پاکستان ڈیموکریٹک موومنٹ (پی ڈی ایم ) کے رہنمائوں کے استقبال کیلئے رائیونڈ جا رہی ہوں جہاں اپوزیشن جماعتوں کی قیادت اکٹھی ہو رہی ہے۔
انہوں نے کہا کہ اس میٹنگ میں ظہرانے کے بعد استعفوں ، لانگ مارچ اور احتجاجی مظاہروں کے حوالے سے حتمی فیصلہ کیا جائے گا۔
اس سے قبل ماڈل ٹاؤن میں پارٹی اجلاس سے خطاب کرتے ہوئے مریم نواز نے دعویٰ کیا کہ لاہور کی تاریخ میں ایسا کامیاب جلسہ نہیں ہوا۔
ان کا کہنا تھا کہ جلسے میں لوگوں کا جم غفیر تھا اور میں وہاں کھڑی ہوکر سوچ رہی تھی کہ جلسہ گاہ چھوٹی پڑ گئی ہے کیونکہ ہزاروں لوگ قافلوں میں تھے جو جلسہ گاہ میں داخل نہیں ہوسکے۔
مریم نواز نے مزید کہا کہ جتنی مشکلات مسلم لیگ (ن) پر آئی ہیں، مجھے یاد نہیں پڑتا کہ اتنی مشکلات کسی اور جماعت آئی ہوں، پارٹی کے تمام ارکان صوبائی اور قومی اسمبلی ان سے گزر رہے ہیں۔
انہوں نے کہا کہ جس طرح لیگی ارکان اور رہنما نوازشریف کے ساتھ کھڑے ہیں اس پر میں بھی حیران ہوں۔
ان کا کہنا تھا کہ یہ خالصتاً عوامی جلسہ تھا جس میں عوام شامل ہوئے، جتنے لوگ جلسہ گاہ میں تھے، اس سے بڑا جلسہ باہر تھا۔
یاد رہے کہ اس سے قبل پی ڈی ایم کے اجلاس میں 31 دسمبر تک تمام صوبائی و قومی اسمبلی کے ارکان کے استعفے اپنی اپنی پارٹی کی قیادت کے حوالے کرنے کا فیصلہ کیا تھا۔
اس کے بعد گزشتہ روز لاہور میں ہونے والے جلسے میں جنوری کے آخر یا فروری کے آغاز میں اسلام آباد کی جانب لانگ مارچ کا بھی اعلان کیا گیا تھا۔
