یوٹیوب اور جی میل سمیت گوگل کی مختلف سروسز پوری دنیا میں تعطل کا شکار ہو گئی جس کی وجہ سے صارفین کو بہت دشواری کا سامنا کرنا پڑا۔
جی میل اور یوٹیوب کے علاوہ گوگل ڈرائیو، گوگل ڈاکس، گوگل میپس، ایڈورڈ اور ایڈسنس اس وقت خرابی کے باعث نہیں کھل رہیں تھیں۔
پورے یورپ، امریکہ، کینیڈا، پاکستان، بھارت، جنوبی افریقہ، آسٹریلیا اور وسطی و جنوبی امریکہ سے ان سروسز کے ڈاؤن ہونے کی خبریں آتی رہیں۔
گوگل کروم اور گوگل کا سرچ کا نظام کام کرتا رہا مگر اس کی رفتار سست پڑ گئی تاہم کئی گھنٹے بند رہنے کے بعد گوگل کی سروسز بحال ہونا شروع ہو گئیں۔
ابھی تک گوگل کے کسی عہدیدار نے اس کی وجہ نہیں بتائی تاہم سوشل میڈیا پر کئی صارفین یہ قیاس آرائی کر رہے ہیں کہ اس کی وجہ روسی ہیکرز کا حمل ہو سکتا ہے جو امریکی حکومت کی دو وزارتوں پر آج کیا گیا ہے۔
اس سائبر حملے کے متعلق نیشنل سکیورٹی کونسل کے ترجمان کا کہنا تھا کہ حکومت اس حوالے سے تمام رپورٹس سے آگاہ ہے اور صورتحال کو بہتر بنانے کے لیے تمام ضروری اقدامات کیے جا رہے ہیں۔
