ملک بھر میں سردی کی نئی لہر کا آغاز، بیشتر علاقوں میں دھند کی پیشگوئی

محکمہ موسمیات نے پیشگوئی کی ہے کہ پاکستان کے جنوبی علاقوں میں شدید سردی اور دھند کی ایک لہر شروع ہونے والی ہے۔

رپورٹ کے مطابق مغربی ہواؤں کا ایک سلسلہ اس وقت شمالی افغانستان سے تیزی سے گزر رہا ہے جس کی وجہ سے اس وقت ملک کے جنوبی علاقوں میں سردی کی لہر میں اضافہ ہو رہا ہے۔

موسم کی خبر دینے والی ویب سائٹ ویدر بسٹرز  پر گزشتہ رات پنجاب کے 90 فیصد علاقوں، مشرقی خیبر پختونخواہ بشمول ڈی آئی خان، لکّی مروت، کوہاٹ اور ہزارہ کے علاقوں، کشمیر کے جنوبی حصّوں اور شمالی سندھ بشمول سکھر میں دھند کی پیشنگوئی کی گئی تھی، جس کی وجہ سے حدِ نگاہ 50 سے 100 میٹر رہ جانے کا بتایا گیا تھا۔

ملک کے جنوبی اور وسطی علاقوں بشمول سندھ، جنوبی پنجاب اور بلوچستان میں درجہ حرارت میں مزید 2 سے 4 ڈگری سینٹی گریڈ کمی کا امکان ہے۔

منگل کی صبح تک راتیں انتہائی سرد اور درجہ حرارت معمول سے انتہائی کم رہنے کا امکان ہے۔ کوئٹہ میں بھی اگلے 48 گھنٹوں میں درجہ حرارت میں 10 ڈگری سینٹی گریڈ تک کمی کا امکان ہے۔

مغربی بلوچستان میں دن کا درجہ حرارت معمول سے 10 سے 15 ڈگری سینٹی گریڈ کم رہے گا جبکہ سرد ہوائیں بھی چلتی رہیں گی۔