سابق بھارتی کھلاڑی آکاش چوپڑا نے قومی ٹیم کے لیگ اسپنر آل راونڈر شاداب خان کو پاکستان سپر لیگ(پی ایس ایل) 2020 کا بہترین کھلاڑی قرار دے دیا۔
شاداب خان نے اسلام آباد یونائیٹڈ کی کپتانی کرتے ہوئے بحیثیت بلے باز آٹھ اننگز میں تین نصف سنچریوں کے ساتھ 37 کی اوسط اور 159 کے اسٹرائیک ریٹ کے ساتھ 263 رنز بنائے۔
سابق بھارتی بلے باز نے اپنے یو ٹیوب ویڈیو میں 21 سالہ آل راونڈر کی تعریف کرتے ہوئے کہا کہ شاداب خان پی ایس ایل ٹورنامنٹ کے بہترین کھلاڑی رہے۔
ان کا کہنا تھا کہ یہ سچ ہے شاداب نے صرف آٹھ وکٹیں ہی حاصل کیں تاہم بحیثیت بلے باز ان کی کارکردگی بہت عمدہ رہی ۔
اس موقع پر انہوں نے کراچی کنگز کے بلے باز بابر اعظم کی بھی تعریف کی، ان کا کہنا تھا کہ بابر تسلسل کے ساتھ اچھی بلے بازی کر رہے ہیں اور وہ پی ایس ایل میں سب سے زیادہ رنز بنانے والے کھلاڑی بھی ہیں۔
