پاکستان کے ضلع حافظ آباد کے ڈپٹی کمشنر نوید شہزاد کی کورونا وائرس سے بچاؤ کے لیے منفرد گیت کی ویڈیو نہ صرف ملک بھر میں مقبول ہوئی بلکہ اس کی شہرت سرحد پار بھی پہنچ گئی ہے۔
پاکستان کے علاوہ بھارت کی معروف بالی ووڈ ویب سائیٹس اور ٹی چینلز پر ڈپٹی کمشنر کا گانا گردش کررہا ہے۔
اپنی اس ویڈیو میں انہوں نے معروف بالی ووڈ اداکار شاہ رخ کی 2003ء میں ریلیز ہونے والی فلم ’’چلتے چلتے ‘‘ کے نغمے ’’سنو نہ سنو نہ ‘‘ کی طرز پر ایک پیغام ریکارڈ کرایا ہے جس کا مقصد کورونا وائرس سے بچاؤ کی آگاہی دینا ہے۔
سوشل میڈیا صارفین کی بڑی تعداد نے ڈپٹی کمشنر حافظ آباد نوید شہزاد کی جانب سے عوام میں آگاہی پھیلانے کے اس انداز کو بے حد سراہا ہے۔
پاکستان کے معروف کرکٹر وسیم اکرم کی اہلیہ شنیرا اکرم نے بھی ڈی سی فیصل آباد کے اس انداز پر اپنے ٹویٹر اکاؤنٹ کے ذریعے پسندیدگی کا اظہار کیا ہے۔
یاد رہے کہ اب تک کورونا وائرس کے باعث دنیا بھر میں دس ہزار سے زائد اموات واقع ہو چکی ہیں، جبکہ پاکستان میں بھی تین افراد اپنی جان سے ہاتھ دھو بیٹھے ہیں۔
پاکستان میں وائرس سے متاثرہ افراد کی تعداد چار سے بڑھ چکی ہے، جن میں اکثریت کا تعلق صوبہ سندھ سے ہے۔
عالمی ادارہ صحت کی جانب سے جاری کردہ ہدایت کے مطابق کورونا وائرس سے بچاؤ کے لیے ہاتھوں کو باقاعدگی سے دھونے اور سوشل سرکل محدود کرنے کی ہدایت کی گئی جس پر دنیا بھر کی معروف شخصیات کی جانب سے سوشل میڈیا کی ویب سائیٹس پر ویڈیو پیغامات آنے شروع ہوئے۔
ڈپٹی کمشنر نوید شہزاد بھی اسی سلسلے کی ایک کڑی ہیں جن کی ویڈیو سوشل میڈیا پر وائرل ہو گئی ہے۔
