اسلام آباد (عمران مگھرانہ) نیشنل ہائی وے اتھارٹی کو مالی سال 25-2024 میں ٹول ریونیو، پولیس جرمانوں اور دیگر مد میں ملک بھر سے 107 ارب 90 کروڑ روپے کی وصولی ہوئی۔
قومی اسمبلی مواصلات کمیٹی میں پیش کی گئی دستاویزات کے مطابق پنجاب سے 55 ارب 7 کروڑ روپے کی کولیکشن ہوئی جبکہ 19 ارب 70 کروڑ روپے کے اخراجات ہوئے۔
سندھ سے 20 ارب 19 کروڑ روپے کی کولیکشن ہوئی۔ 8 ارب 91 کروڑ روپے کے اخراجات آ ئے۔ خیبر پختونخوا میں کولیکشن سے زائد اخراجات ہوئے۔ خیبر پختونخوا میں 11 ارب 98 کروڑ روپے کی کولیکشن ہوئی جبکہ 12 ارب 24 کروڑ روپے کے اخراجات رہے۔
اسی طرح بلوچستان میں 10 ارب 57 کروڑ کے اخراجات رہے جبکہ 65 کروڑ روپے کی کولیکشن ہوئی۔ آ زاد جموں کشمیر سے 18 کروڑ روپے کی کولیکشن ہوئی۔ 1 ارب 58 کروڑ روپے کے اخراجات ہوئے۔
گلگت بلتستان میں 4 ارب 14 کروڑ روپے کے اخراجات ہوئے جبکہ 4 کروڑ روپے کی کولیکشن رہی۔ این ایچ اے کو صرف 1 سال میں پولیس جرمانوں کی مد میں 17 ارب 20 کروڑ کی کولیکشن ہوئی۔
دستاویزات کے مطابق ملک بھر میں نیشنل ہائی ویز پر 100 ٹول پلازے ہیں۔ پنجاب میں 46، سندھ میں 26، خیبر پختونخوا میں 13،بلوچستان میں 11 اور گلگت بلتستان میں 2 ٹول پلازے ہیں۔
