راولپنڈی(دانیال ہاشمی سے ) تھانہ چونترہ کے علاقے میں ڈکیتی کی واردات کے دوران ڈاکوؤں کی فائرنگ سے چھٹی پر گھر آنے والا پاک فوج کا اہلکار جاں بحق ہو گیا۔
پولیس کے مطابق مقتول کی شناخت محمد ادیب کے نام سے ہوئی ہے۔ مقتول کے بھائی محمد حسین کی درخواست پر چونترہ پولیس نے ڈکیتی اور قتل کی دفعات کے تحت مقدمہ درج کر لیا ہے۔
متن مقدمہ کے مطابق محمد ادیب پاک فوج میں ملازم تھا اور چھٹی پر گھر آ رہا تھا۔ اس نے فون پر بھائی کو بتایا کہ وہ چکری انٹرچینج پہنچ رہا ہے اور موٹرسائیکل پر لینے آ جائے۔ بعد ازاں محمد ادیب چکری اڈے پر پہنچا جہاں اس کا دوست رحمت خان، سکنہ مردان، بھی اس کے ہمراہ تھا۔
مقدمے میں بتایا گیا کہ محمد ادیب نے بھائی سے کہا کہ وہ رحمت خان کو سہال چھوڑ کر آتا ہے اور اسے وہیں رکنے کو کہا۔ کافی دیر تک واپس نہ آنے پر بھائی نے فون کیا تو رحمت خان نے کال اٹینڈ کر کے فائرنگ کے واقعے کی اطلاع دی۔
محمد حسین کے مطابق وہ رینجر کیڈٹ کالج کے قریب واصل ہسپتال کے سامنے پہنچا تو محمد ادیب زخمی حالت میں پڑا تھا جبکہ رحمت خان قریب موجود تھا۔ رحمت خان نے بتایا کہ موٹرسائیکل پر سوار تین نامعلوم ڈاکوؤں نے محمد ادیب کو روکنے کی کوشش کی، نہ رکنے پر ایک ملزم نے فائرنگ کر دی جو سر میں لگنے سے وہ شدید زخمی ہو گیا، جبکہ ملزمان فرار ہو گئے۔
اطلاع ملنے پر پولیس موقع پر پہنچ گئی، تاہم محمد ادیب زخموں کی تاب نہ لاتے ہوئے دم توڑ گیا۔ پولیس نے واقعے کی تفتیش شروع کر دی ہے۔
