اسلام آباد میں ایف آئی اے اینٹی کرپشن سرکل نے جعلی تعلیمی اسناد پر سرکاری ملازمت حاصل کرنے کے خلاف بڑی کارروائی کرتے ہوئے کیپیٹل ڈیولپمنٹ اتھارٹی (سی ڈی اے) کے 26 ملازمین کو گرفتار کر لیا ہے۔
ایف آئی اے حکام کے مطابق آج 2 مارچ 2026 کو معزز عدالت کی جانب سے قبل از گرفتاری ضمانت منسوخ ہونے کے بعد ملزمان کو حراست میں لیا گیا۔ گرفتار افراد سی ڈی اے میں بی پی ایس 05 سے بی پی ایس 14 تک مختلف عہدوں پر تعینات تھے اور انہوں نے مبینہ طور پر جعلی ڈگریوں اور بوگس اسکول سرٹیفکیٹس کی بنیاد پر نوکریاں حاصل کیں۔
ایف آئی اے کے مطابق ملزمان نے جعلی دستاویزات کے ذریعے نہ صرف سرکاری عہدے حاصل کیے بلکہ ناحق تنخواہیں اور دیگر مراعات بھی وصول کرتے رہے۔
ایف آئی اے نے بتایا ہے کہ اس معاملے میں بھرتی کمیٹی کے ارکان، تعلیمی اسناد کی تصدیق کرنے والے اداروں اور تقرری کی منظوری دینے والے افسران کے کردار کی بھی باریک بینی سے تحقیقات جاری ہیں، تاکہ یہ تعین کیا جا سکے کہ ان غیر قانونی تقرریوں میں کس حد تک سہولت کاری کی گئی۔
گرفتار ملزمان کو کل عدالت میں پیش کیا جائے گا، جہاں مزید قانونی کارروائی عمل میں لائی جائے گی۔
