لاہور: پنجاب کے مختلف اسپتالوں میں کورونا وائرس سے متاثرہ افراد پر ملیریا کی دوا کا استعمال شروع کر دیا گیا ہے۔
میو اسپتال کے سی او او ڈاکٹر اسد اسلم نے تصدیق کی ہے کہ اسپتال میں کورونا ٹیسٹ مثبت آنے والے مریضوں پر ملیریا کی دوا استعمال کی جارہی ہے۔
ان کا کہنا ہے کہ میو اسپتال لاہور میں 15 دن میں 8 مریض صحت یاب ہو کر گھر جا چکے ہیں اور جو مریض صحت یاب ہو کر گئے ہیں ان پر دوا کا نتیجہ بظاہر کامیاب رہا۔
ڈاکٹر اسد اسلم نے بتایا کہ چین میں ملیریا کی دوا کے استعمال کے بعد یہاں بھی ڈاکٹرز یہ دوا استعمال کررہے ہیں، پنجاب کے اسپتالوں میں ملیریا کی دوا پہلے سے موجود ہے۔
ملک بھر میں کورونا مریضوں کی تعداد دو ہزار سے تجاوز کر گئی
پنجاب کے مختلف شہروں میں کورونا وائرس کے مریضوں میںاضافہ
پاکستان میں ٹرین کے ڈبے آئسولیشن وارڈز میں تبدیل
دوسری جانب ترجمان پنجاب حکومت کا کہنا ہےکہ حکومت نے ملیریا کی 50 ہزار سے زائد گولیاں مزید اسٹاک کرلی ہیں۔
مارکیٹ ذرائع کے مطابق لاہور کی مارکیٹوں سے ملیریا کی دوا غائب ہو چکی ہے۔
واضح رہےکہ امریکی ڈرگ اینڈ فوڈ ایڈمنسٹریشن نے کورونا کے مریضوں کے لیے مشروط طور پر ملیریا کی دوا استعمال کرنے کی منظوری دی ہے۔
تاہم امریکی ادارے سی ڈی سی نے انتباہ جاری کیا ہے کہ ڈاکٹر کی مشاورت کے بغیر یہ دوائی استعمال نہ کی جائے۔
اس سے قبل امریکی ریاست ایرازونا میں ایک شخص نے کلوروکوئین فاسفیٹ خرید کر استمعال کی تھی جس کے باعث وہ خود موت کے منہ میں چلا گیا اور اس کی بیوی اسپتال داخل ہو گئی تھی۔
