اٹلی کی ہیلتھ ایسوسی ایشن نے اس بات کی تصدیق کی ہے کہ ملک میں کورونا وبا سے جاں بحق ہونیوالے ڈاکٹروں کی تعداد سو تک پہنچ گئی ہے۔
ایسوسی ایشن کے ترجمان کے مطابق بدقسمتی سے اس وائرس کا شکار ہونیوالے اطالوی ڈاکٹروں کی تعداد اس وقت 100 کا ہندسہ عبور کر رہی ہے۔
جاں بحق ہونیوالوں میں وہ ریٹائرڈ ڈاکٹرز بھی شامل ہیں جنہوں نے اس وباء میں مدد دینے کے لیے ایک ماہ قبل حکومت سے خود رابطہ کیا تھا، اس وقت تک اٹلی میں کورونا وائرس کا شکار ہو کر مرنیوالوں کی تعداد 17 ہزار 6 سو 69 ہوگئی ہے۔
کورونا کے شکار اٹلی کے 72 سالہ پادری نے قربانی کی لازوال داستان رقم کر دی
شہید یا ہیرو: وبا کے دنوں میں ڈاکٹرز مریضوں کو بچائیں یا خود کو؟
آئرلینڈ کے وزیراعظم بطور ڈاکٹر کورونا مریضوں کا علاج کریں گے
اطالوی میڈیا رپورٹس کے مطابق اب تک کورونا وائرس سے اندازاً 30 نرسیں اور ان کی معاونین بھی اس عالمی وباء کا شکار ہوکر جان کی بازی ہار چکی ہیں۔
اطالوی ہیلتھ ایسوسی ایشن کے سربراہ فلیپو انیلی کی جانب سے جاری ایک ویب بیان کے مطابق مناسب حفاظتی سامان کے بغیر کورونا وائرس جیسے وبائی مرض سے لڑنے کا کہنا ’منصفانہ معرکہ ‘ نہیں تھا۔
روم پبلک ہیلتھ انسٹی ٹیوٹ کے ایک اندازے کے مطابق اٹلی میں کورونا وباء کا شکار ہونیوالوں میں سے 10 فیصد لوگ صحت کے شعبہ میں کام کرنیوالے ہیں۔
یورپ میں اٹلی کورونا وباء سے سب سے پہلے متاثر ہونیوالے ممالک میں شامل ہے، اٹلی نے 12 مارچ کو حالات کی سنگینی کو مدنظر رکھتے ہوئے اپنے تمام کاروباری مراکز بند کردیے تھے۔
اطالوی حکومت اب اس بات پر غور کررہی ہے کہ معاشرتی دوری کے اقدامات کو کب اور کیسے کم کیا جائے جن میں اب تک 13 اپریل تک توسیع کی گئی ہے۔
