سعودی عرب کی وزارت مذہبی ، تبلیغی و رہنمائی امور نے اعلان کیا ہے کہ کورونا وائرس کے خاتمے تک نماز باجماعت پر پابندی نہیں اٹھائی جائے گی، اس لیے رمضان کے دوران نماز تراویح صرف گھروں میں پڑھی جائے گی۔
الریاض اخبار کے مطابق سعودی عرب کے وزیر برائے اسلامک افیئرز ڈاکٹر عبداللطیف الشیخ نے کہا ہے کہ مساجد میں پانچ وقت نماز کی ادائیگی کو معطل کرنا نماز تراویح کو روک دینے سے زیادہ اہم بات ہے۔
انہوں نے کہا کہ ہم اللہ سے دعا کرتے ہیں کہ وہ نماز تراویح کو قبول فرمائے چاہے ہم اسے مسجدوں میں ادا کریں یا گھروں پر۔
مسلمان ممالک حج کے لیے ابھی معاہدے نہ کریں، سعودی عرب کا اعلان
انہوں نے کہا کہ ہم اللہ سے یہ دعا بھی کرتے ہیں کہ وہ ہماری عبادات کو قبول فرمائے اور انسانیت کو اس وبا سے محفوظ رکھے جس نے پوری دنیا کو اپنی لپیٹ میں لے رکھا ہے۔
منسٹری آف ہیلتھ اور دیگر محکموں کی ہدایات کے مطابق نماز جنازہ میں بھی فوت ہونے والے کے پانچ سے چھ رشتہ دار شرکت کر سکیں گے جبکہ دیگر افراد گھر پر دعا کریں گے۔
الشیخ نے کہا کہ نماز جنازہ فرض نمازوں سے زیادہ اہم نہیں ہے اس لیے اکیلے بھی دعا کی جا سکتی ہے، زیادہ ضروری بات یہ ہے کہ ایک ہی جگہ پر زیادہ افراد کا اجتماع نہیں ہونا چاہیے کیونکہ اس سے وائرس کے پھیلاؤ کا خطرہ ہے۔
