وفاقی وزیر برائے مذہبی امورنورالحق نے سپریم کورٹ میں اٹارنی جنرل سے ملاقات کے بعد صحافیوں سے گفتگو کرتے ہوئے کہا ہے کہ پاکستانیوں کو حج کا فریضہ ادا کرنے کی اجازت کا فیصلہ رمضان المبارک کے بعد کیا جائے گا۔
حج سے متعلق ایک سوال کے جواب پر انہوں نے کہا کہ حکومت کی کوشش اور خواہش یہی ہے کہ حج ہو جائے۔
مسلمان ممالک حج کے لیے ابھی معاہدے نہ کریں، سعودی عرب کا اعلان
سعودی عرب حکومت نے رواں برس حج منسوخ کرنے کا عندیہ دے دیا
انہوں نے کہا کہ سعودی عرب کے ساتھ مل کر کئی آپشنز پر غور کر رہے ہیں تاہم پاکستانی حج کا فریضہ ادا کر سکیں گے یا نہیں اس کا حتمی فیصلہ ماہ رمضان کے آخر میں کیا جائے گا۔
وفاقی وزیر کا کہنا تھا کہ وہ کسی مقدمہ کے سلسلے میں نہیں بلکہ کچھ وزارتی امور پر اٹارنی جنرل سے مشاورت کرنے آئے تھے۔
اس سے قبل سعودی عرب کے وزیر حج محمد بینتن نے تمام ممالک سے کہا تھا کہ جب تک کورونا وائرس کی وبا کی صورتحال واضح نہیں ہوتی، وہ حج معاہدوں کے لیے انتظار کریں۔
سعودی عرب کے ریاستی ٹی وی سے گفتگو کرتے ہوئے انہوں نے کہا تھا کہ سعودی حکومت زائرین کو تمام سہولیات فراہم کرنے کے لیے تیار ہے تاہم موجودہ صورتحال میں عالمی وباء کے لیے سعودی ریاست مسلمانوں اور شہریوں کی صحت کے تحفظ کی خواہاں ہے۔
24 مارچ کو سعودی عرب کی وزارت مذہبی امور کے سینئر حکام نے تمام حج کمپنیوں سے کہا تھا کہ وہ کسی ہوٹل .ٹرینر یا ٹکٹ کے لیے کوئ معاہدہ نہ کریں۔
