بھارتی وزیراعظم نریندر مودی نے قوم سے خطاب کے دوران ہندوستان میں لاک ڈاؤن میں دو ہفتوں کی توسیع کا اعلان کر دیا ہے۔
اپنے خطاب میں بھارتی وزیراعظم کا کہنا تھا کہ لاک ڈاؤن کی مدت میں توسیع تمام اسٹیک ہولڈرز کی دی ہوئی تجاویز کو مد نظر رکھ کر کی گئی ہے۔
انہوں نے کہا کہ ہم ملک میں ایک بڑے ہیلتھ انفراسٹرکچر کی طرف قدم بڑھا رہے ہیں اور اس مقصد کےلیے کافی فنڈز کا انتظام کیا گیا ہے۔
دنیا کا سب سے بڑا لاک ڈاؤن، بھارتی معیشت کا ٹائی ٹینک ڈوبنے لگا
ویکسین تیار ہونے سے پہلے لاک ڈاؤن کا خاتمہ کورونا وبا کو واپس لا سکتا ہے، ماہرین کا انتباہ
یورپ میں لاک ڈاؤن کم کرنے کا آغاز، معاشی سرگرمیاں شروع ہونے کا امکان
نریندر مودی نے اپنے خطاب میں بتایا کہ جنوری میں ہندوستان میں کورونا ٹیسٹ کی صرف ایک لیب تھی لیکن آج پورے ملک میں 220 لیبارٹریز قائم کی جا چکی ہیں۔
ٹائمز آف انڈیا کے مطابق مودی نے اپنے خطاب میں کہا کہ مجھے پتہ ہے کہ آپ لاک ڈاؤن کی وجہ سے شدید مشکلات کا شکار ہیں، کچھ لوگوں کو خوراک کی کمی کا سامنا ہے جبکہ بعض اپنے خاندان سے دور رہنے پر مجبور ہیں۔
انہوں نے کہا کہ مجھے پتہ ہے آپ لوگ اس وبا سے نمٹنے کے لیے سپاہی کی طرح کام کر رہے ہیں، لاک ڈاؤن کی وجہ سے ہندوستان اس وبا کا پھلاؤ بڑی حد روکنے میں کامیاب رہا ہے، آپ تمام لوگ ہندوستان کی قوم کو بچانے کے لیے قربانی دے رہے ہیں۔
بھارتی وزیراعظم کا کہنا تھا کہ جب ہندوستان میں ایک بھی کورونا کیس نہیں تھا اس وقت ہم نے اپنی ذمہ داری نبھاتے ہوئے کرونا وائرس سے متاثر ملکوں سے آنے والے مسافروں کی اسکرینگ شروع کر دی تھی۔
انہوں نے کہا کہ اگر حکومت کورونا کے خلاف بروقت جلد فیصلے نہ کرتی تو ہم اس وبا کا بری طرح شکار ہو جاتے، اب تک کے نتائج دیکھ کر پتہ چلتا ہے کہ حکومت کے اقدامات ٹھیک راستے پر جا رہے ہیں
نریندر مودی نے اعتراف کیا کہ ہندوستان اپنی قوم کی صحت کی خاطر ایک بہت بڑے معاشی نقصان کی صورت میں قیمت چکا رہا ھے لیکن اس نقصان کا ہندوستان کی عوام کی ذندگیوں کے سامنے کوئی مقابلہ نہیں۔
انہوں نے کہا کہ دیہاڑی دار طبقے کی مشکلات کا حکومت کو اندازہ ہے، وہ میری فیملی کی طرح ہیں، حکومت ان کی مشکلات کم کرنے کے لیے کام کر رہی ہے۔
بھارتی میڈیا کے مطابق وزیراعظم مودی نے خطاب سے پہلے ہفتہ کے روز تمام صوبوں کے وزرائے اعلیٰ کے ساتھ ویڈیو لنک پر مشاورت کی۔
میٹنگ میں "جان بھی جہان بھی” کے حکومتی نعرے کے تحت تمام ریاستوں نے لاک ڈاؤن میں توسیع پر مودی کے فیصلے کی تائید کی جس کے بعد ملک میں تین مئی تک لاک ڈاؤن میں توسیع کر دی گئی۔
