اسلام آباد: سپریم کورٹ سے جاری پریس ریلیز کے مطابق چیف جسٹس پاکستان جسٹس گلزار احمد اور ان کے اہلخانہ کے کورونا ٹیسٹ منفی نکلے ہیں۔
اعلامیے میں بتایا گیا ہے کہ چیف جسٹس کے سیکرٹری کا بھی کورونا ٹیسٹ کیا گیا جو منفی آیا۔
چیف جسٹس اور انکے اہلخانہ کا کورونا ٹیسٹ ان کے اسٹاف میں شامل ایک اہلکار میں وائرس کی تصدیق کے بعد کیا گیا۔
چیف جسٹس کے سٹاف اہلکار میں کورونا کی تصدیق، مقدمات ملتوی
واضح رہے کہ چیف جسٹس آف پاکستان جسٹس گلزار احمد کے اسٹاف اہلکار میں کورونا وائرس کی تصدیق کے بعد کمرہ نمبر 1 میں آج لگنے والے تمام کیسز ڈی لسٹ ہو گئے تھے
چیف جسٹس کے اسٹاف اہلکاروں میں شامل نائب قاصد کا تین روز قبل ٹیسٹ کیا گیا تھا اور سیمپل نیشنل انسٹیٹیوٹ آف ہیلتھ میں بھجوائے گئے جہاں سے ٹیسٹ مثبت آیا۔
کاز لسٹ کے مطابق آج چیف جسٹس گلزار احمد کی سربراہی میں دو رکنی بینچ نے پانچ آئینی درخواستوں اور ایک نظرثانی درخواست کی سماعت کرنا تھی تاہم کمرہ نمبر 1 میں عدالت نہ لگی اور کیسز ڈی لسٹ ہوگئے۔
کورونا سے متاثر ہونے والا نائب قاصد اس وقت پولی کلینک کے قرنطینہ وارڈ میں زیر علاج ہے۔
ذرائع کے مطابق سپریم کورٹ میں ججز کے دیگر اسٹاف کے ٹیسٹ کیے جا رہے ہیں۔
