ڈنمارک یورپ کا پہلا ملک بن گیا جس نے کورونا وبا کے باعث بند کیے گئے اسکول کھولنے کا اعلان کر دیا ہے۔
نرسریز، کنڈرگارٹنز اور پرائمری اسکول آج بدھ کے روز کھل گئے ہیں، یہ تعلیمی ادارے 12 مارچ کو کورونا وبا کے پھیلنے کے خدشے کے پیش نظر بند کر دیے گئے تھے۔
البتہ ڈنمارک کی آدھی میونسپلٹیز اور کوپن ہیگن کے 35 فیصد اسکولز میں کلاسز شروع ہوں گی کیونکہ دیگر اداروں نے ابھی صحت کے پروٹوکولز پر عملدرآمد کے لیے مطلوبہ تیاریاں کرنی ہیں۔
کورونا وباء کے حوالے سے سویڈن کی حکمت عملی نے دنیا کو حیران کردیا
دنیا کا واحد ملک جہاں کورونا کے تمام مریض صحتیاب ہو گئے
مردہ جسم سے زندہ انسان میں کورونا کے منتقل ہونے کا پہلا کیس سامنے آ گیا
20 اپریل کو تمام اسکولز میں تعلیمی سیشن شروع ہو جائے گا۔
اپریل کے شروع میں حکومت نے اعلان کیا تھا کہ کہ اسکولز اس شرط پر کھولے جائیں گے کہ ہر شخص دوسرے سے فاصلہ قائم رکھے گا اور باقاعدگی سے ہاتھ دھوئے گا۔
اسکولوں کو ہدایت کی گئی ہے کہ وہ کلاس رومز کی ڈیسکوں کے درمیان کم از کم دو میٹر کا فاصلہ یقینی بنائیں جبکہ تفریح کا وقت بھی چھوٹے چھوٹے گروہوں کی صورت میں گزارا جائے۔
ان اصولوں پر عمل کرنے کے لیے کئی اسکولز نے باہر کلاسز رکھنے کی حمایت کی ہے تاہم شہری علاقوں میں ایسا کرنا ایک چیلنج ہو گا۔
کچھ والدین نے بچوں کی صحت کے متعلق تشویش کے باعث حکومت کے اس فیصلے کی مخالفت کی ہے، انہوں نے ‘میرا بیٹا ایک گنی پگ نہیں ہے’ کے عنوان سے ایک پٹیشن شروع کر دی ہے جس پر اب تک 18 ہزار لوگوں نے دستخط کیے ہیں۔
نوریبرو کے اسکول کے پرنسپل ہینرک ویلمسن کے مطابق توقع یہی ہے کہ بہت سے بچے ابھی گھروں میں ہی رہیں گے۔
ڈنمارک میں مڈل اور ہائی اسکول کے طلبہ فی الحال گھر سے پڑھائی کیا کریں گے، ان کے اسکولز 10 مئی تک کھلنے کی توقع ہے۔
اب تک ڈنمارک میں کورونا کے 6 ہزار 6 سو 91 کیسز سامنے آئے ہیں، جبکہ 299 افراد اس وبا سے ہلاک ہو چکے ہیں۔
ملک بھر میں دس سے زائد افراد کے اجتماع پر پابندی عائد ہے، ریسٹورنٹس، حجام، شاپنگ مالز اور کلب بند کر دیے گئے ہیں۔
ڈنمارک سے قبل آسٹریا یورپ کا پہلا ملک تھا جس نے زندگی کو نارمل پر لانے کا روڈ میپ پیش کیا تھا۔
منگل کے روز آسٹریا میں نان فوڈ آئٹمز کی دکانیں کھولنے کی اجازت دی گئی تھی تاہم دکانوں اور پبلک ٹرانسپورٹ پر سماجی فاصلہ قائم رکھنا اور چہرے کو ماسک سے ڈھانپنا ضروری قرار دیا گیا ہے۔
آسٹریا میں اسکول، کیفے اور ریسٹورنٹ مئی کے وسط تک بند رہیں گے۔
