وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ مفتی منیب الرحمان کو اتنا بڑا چاند نظر نہیں آتا تو اسقدر چھوٹا کورونا کہاں سے دکھائی دے گا۔
سماجی رابطے کی ایپ ٹوئٹر پر انہوں نے کہا کہ مفتی منیب الرحمان ہمارے بزرگ ہیں لیکن انہیں حکومتی احکامات کا مذاق نہیں اڑانا چاہیے۔
فواد چوہدری نے کہا کہ وزارت مذہبی امور کی توجہ اس جانب دلائی ہے کہ اگر وزارتی کمیٹی کے سربراہ حکومتی احکامات کا یوں مذاق اڑائیں گے تو باقیوں سے کیا توقع کی جا سکتی ہے؟
مولانا منیب الرحمنٰ ہمارے بزرگ ہیں احترام ہے لیکن ان کو اتنا بڑا چاند نظر نہیں آتا اتنا چھوٹا کرونا وائرس کہاں سے نظر آنا ہے، وزارت مذھبی امور کی توجہ دلائ ہے کہ آپ کی وزارتی کمیٹی کے سربراہ اگر حکومتی احکامات کا یوں مذاق اڑائیں گے تو باقیوں سے کیا توقع؟
— Ch Fawad Hussain (@fawadchaudhry) April 15, 2020
ایک اور ٹوئٹ میں انہوں نے کہا کہ جہاں تک رمضان کا تعلق ہے تو 24 اپریل کو رمضان کا چاند نظر آ جائے گا اور انشااللہ 25 اپریل کو پہلا روزہ ہو گا۔
انہوں نے کہا کہ پہلے ارادہ تھا کہ چاند دیکھنے کے لیے لوگوں کو اکٹھا کریں گے مگر کورونا نے اس اجتماع کو منسوخ کرا دیا۔
فواد چوہدری نے کہا کہ اگلے چاند چاند رات کی تقریبات کریں گے۔
جہاں تک رمضان کا تعلق ہے 24 اپریل کو رمضان کا چاند نظر آجائیگا اور انشاآللہ 25 اپریل کو پہلا روزہ ہو گا۔ پہلے ارادہ تھا اس بار لوگوں کو اکٹھا کریں گے چاند دیکھنے کیلئے لیکن اب کرونا نے ہر اجتماع کینسل کرا دیا۔ انشاللہ اگلے سال موقع ملا تو چاند رات کی تقریبات کریں گے۔
— Ch Fawad Hussain (@fawadchaudhry) April 15, 2020
یاد رہے کہ عید کے چاند پر ماضی میں بھی فواد چوہدری اور مفتی منیب الرحمان کے درمیان سخت باتوں کا تبادلہ ہو چکا ہے۔
