اسکاٹ لینڈ کے شہر گلاسکو کے 57 سالہ بزنس مین رضا چوہدری کورونا وائرس کا شکار ہوکر چل بسے، ان کی غمزدہ اہلیہ اپنے خاوند سے جڑی یادوں کو دہراتے ہوئے رو پڑیں۔
رضا چوہدری اسکاٹ لینڈ کے شہر گلاسکو میں پراپرٹی کے شعبہ کے کامیاب بزنس مین تھے جو کورونا وائرس کاشکار ہوکر 15 روز تک وینٹی لیٹر پر رہنے کے بعد وفات پا گئے۔
معذرت میں اب آپ کا بوسہ نہیں لے سکوں گی، دو کورونا مریض اور ان کی بیٹیوں کا دکھ
کورونا کے شکار اٹلی کے 72 سالہ پادری نے قربانی کی لازوال داستان رقم کر دی
سمیرہ چوہدری نے آئی ٹی وی سے گفتگو کرتے ہوئے بتایا کہ جب میرے خاوند وینٹی لیٹر پر تھے تو میں نے اُن کا ہاتھ تھام کر انہیں کہا کہ آپ کے بچے آپ سے بہت پیار کرتے ہیں، جو کچھ آپ کے ساتھ ہو رہا ہے یہ بہت دکھ دینے والا ہے۔
وہ بتاتی ہیں کہ جب میرے خاوند نے میرا ہاتھ تھاما تو مجھے ایسے محسوس ہوا کہ کوئی لہر میرے جسم میں دوڑ گئی ہو اور وہ مجھ تک پہنچنے کی کوشش کررہے ہوں، اس کے بعد مجھے محسوس ہوا کہ اُن کے بازو ٹھنڈے پڑ گئے ہیں۔
سمیرہ چوہدری نے بتایا کہ ان کی شادی کے 23 سال کے دوران انہوں نے کبھی انہیں کسی بیماری میں اتنا تکلیف میں مبتلاء نہیں دیکھا جتنا وہ گلے کی سوزش کی وجہ سے تھے۔
رضا چوہدری کے تین بچے ہیں اور انہوں نے گلاسکو میں پراپرٹی ڈویلپمنٹ کا کامیاب بزنس کیا، مسز چوہدری کا کہنا تھا کہ ان کے بچے اس دُکھ کی وجہ سے بہت تکلیف محسوس کررہے ہیں۔
انہوں نے بتایا کہ ان کا چھوٹا بچہ 14 سال کا ہے اوروہ اپنے والد کے بہت زیادہ قریب تھا۔ وہ اس تکلیف کو محسوس کرتے ہوئے مجھ سے بار بار کہتا ہے کہ ماما کیوں، آخر میرا والد ہی اس بیماری کا نشانہ کیوں بنا؟
وہ کہتا ہے کہ میں اپنے پاپا سے گلے ملنا چاہتا ہوں اور چاہتا ہوں پاپا مجھے اپنے گلے سے لگا لیں، لیکن اب اُن کے پاپا کبھی انہیں گلے سے نہ لگا پائیں گے۔
