برطانیہ کا سب سے بڑا شکاری پرندہ 240 سال کے بعد پہلی بار انگلینڈ کی فضاؤں میں دیکھا گیا ہے۔
ایک وقت تھا کہ سفید دم والے یہ عقاب جن کے پروں کا پھیلاؤ 2.5 میٹر ہے، اٹھارویں صدی تک جنوبی انگلینڈ میں بکثرت دیکھے جاتے تھے جو بعد ازاں غیر قانونی شکار کے باعث منظرعام سے غائب ہو گئے۔
ان پرندوں کو آخری بار انگلینڈ میں 1780 میں جزیرہ آئل آف وائیٹ میں کیلور کلف (Culver Cliff) کے مقام پر دیکھا گیا تھا۔ 1918 میں پورے یو کے سے مکمل طور پر ناپید ہونے سے پہلے آخری پرندے کو سکاٹش شیٹلینڈ جزیرہ پر گولی ماری گئی تھی۔
رائل سوسائٹی فار پروٹیکشن آف برڈز کے مطابق یورپین سمندری عقابوں کی آبادی بھی برے اور ظالمانہ سلوک کی وجہ سے متاثر ہوئی جس سے متعدد ممالک کو ان کی تعداد میں نمایاں کمی اور مکمل خاتمے کا سامنا کرنا پڑا۔ لیکن فاریسٹری انگلینڈ اور رائے ڈینس وائلڈ لائف فاؤنڈیشن کی کوششوں کی بدولت یہ پرندے دوبارہ لوٹ رہے ہیں۔
دی انڈپنڈنٹ کے مطابق گزشتہ موسم گرما میں ایک پانچ سالہ منصوبہ کے تحت چھ عدد سفید دم والے جوان عقابوں کو آئل آف وائیٹ پر چھوڑا گیا تاکہ جنوبی انگلینڈ میں اس نسل کی بحالی کو دوبارہ سے ممکن بنایا جا ئے۔
ان پرندوں کو جی پی ایس ٹریکر لگایا گیا ہے اور اس پروگرام کے پیچھے کام کرنے والی ٹیم چار نوجوان پرندوں کی ٹریکنگ کر رہی ہے کیونکہ یہ ان کا پہلا سفر ہے۔
سیٹلائیٹ کے ذریعےحاصل شدہ اعدادوشمار نے اس ٹیم کو پرندوں کے رویے سمجھنے سے متعلق دلچسپ مدد فراہم کی ہے جو کہ موسم سرما کے دوران کافی سست تھے لیکن اب انھوں نے مزید دور دراز علاقوں کو دریافت کرنا شروع کر دیا ہے کیونکہ موسم بہار کا آغاز ہوچکا ہے۔
ان عقابوں میں سے ایک G393 نر اور G318 مادہ عقاب شمالی یارک تک دور اڑ گئے۔ یہ جوڑا نیشنل پارک میں کئی دن تک رہا اور ساحل کا سفر بھی کیا۔ جہاں انھوں نے 4 گھنٹے ویٹ بائے اور سالٹ برن بائے کے درمیان 12 میل طویل ساحلی پٹی کی کھوج میں گزارے۔
اسی طرح G274 نر پرندے نے 3 دن میں جنوب مشرقی انگلینڈ کا 325 طویل سفر کیا اور بظاہر ایسا لگتا ہے کہ اس نے ایک مادہ G324 کے ساتھ موسم سرما کے مہینوں میں آئل آف وائیٹ (Isle of Wight) کے مقام پر محبت کا رشتہ جوڑ لیا ہے۔
سفید دم والے عقاب اس وقت تک افزائش نسل کا عمل نہیں کرتے جب تک ان کی عمر 4 سے 5 سال نہ ہو جائے ۔ امید کی جا رہی ہے کے نر G274 اور مادہ G324 اگر اس وقت تک زندہ رہنے میں کامیاب رہے تو وہ ایک جوڑے کی صورت میں مل کر اپنی نسل کو آگے بڑھائیں گے۔
یہ پرندے "بیٹھو اور انتظار کرو” جیسی حکمت عملی اپنانے کی وجہ سے جانے جاتے ہیں کیونکہ یہ اپنے شکار کےلئے طویل سفر طے کرنے کی بجائے شکار کا "انتظار اور نظر رکھنا” (wait &watch) پسند کرتے ہیں جس سے ان کی قیمتی توانائی بچ جاتی ہے۔
دی رائے ڈینس وائلڈ لائف فائونڈیشن کے بانی رائے ڈینس نے کہا کہ ” میں نے اپنی زندگی کا بیشتر حصہ ان زبردست پرندوں کو دوبارہ متعارف کرانے میں صرف کیا ہے، ان کو آئل آف وائیٹ کے آسمانوں پر اڑتے دیکھنا میرے لئے واقعی ایک خاص لمحہ تھا”۔
جنوبی انگلینڈ میں سفید دم والے عقابوں کا قیام یورپ کے دیگر ممالک جیسا کہ نیدرلینڈز، آئر لینڈ اور فرانس میں بھی ان پرندوں کی آبادی کو فروغ دینے میں مدد فراہم کرے گا۔ اس سرگرمی کا مقصد یورپ کے جنوب میں پرندوں کی اس نسل کو بحال کرنا ہے۔
انگلینڈ فورسٹری سے تعلق رکھنے والے بروس روتھنی نے مزید کہا کہ ہمیں بے حدفخر ہے کہ آئل آف وائیٹ اور اس کے گردونواح میں جنوبی ساحل پر واقع جن جنگلات کی ہم دیکھ بھال کرتے ہیں وہ اب حیرت انگیز طور پر ان نایاب پرندوں کی رہائش گاہ بن گئی ہیں ۔
