اسلام آباد: پاکستان کے فارن آفس میں ایک سینئر سفارتکار کو ایک غیرملکی خاتون کو جنسی ہراساں کرنے کے الزام میں نوکری سے برطرف کر دیا گیا ہے۔
تفصیلات کے مطابق کیف میں فرسٹ سیکرٹری کے فرائض سرانجام دینے والے وقار احمد نے مقامی لیڈی کلینر اور میسنجر کو جنسی طور پر ہراساں کیا تھا۔
وزارت خارجہ کی جانب سے جاری کردہ اعلامیہ کے مطابق ان پر غیرمہذب رویہ اختیار کرنے اور ملازمت کے ڈسپلن کی خلاف ورزی کا الزام بھی عائد کیا گیا ہے۔
اس کے علاوہ ان پر اختیارات کے ناجائز استعمال، ماحول خراب کرنے اور ایک مقامی ملازم کو ناجائز طور پر نوکری سے برطرف کرنے کا الزام بھی ہے۔
وقار احمد 18ویں گریڈ کے افسر تھے اور یوکرین کے دارالحکومت کیف میں فرسٹ سیکرٹری کے عہدے پر فائز تھے۔
ان کے خلاف الزامات ثابت ہونے کے بعد فوری طور پر نوکری سے برطرف کر دیا گیا ہے۔
