سوشل میڈیا پر ایک ویڈیو بہت مقبول ہو رہی ہے جس میں ایک چینی بچے کو اسکول میں داخل ہوتے دکھایا گیا ہے، وہاں اسے جن مراحل سے گزرنا ہوتا ہے وہ بہت دلچسپ اور دل کو چھونے والے ہیں۔
منہ پر ماسک لگائے یہ چھوٹا سا بچہ جب اسکول کے دروازے پر پہنچنا ہے تو ایک استانی وہاں موجود ہوتی ہے، دونوں جھک کر ایک دوسرے کو آداب کہتے ہیں۔
اس کے بعد بچہ جوتے سمیت اپنے پاؤں باری باری اٹھاتا ہے جن پر استانی جراثیم کش ادویات کا سپرے کرتی ہے، اس کے بعد وہ ڈسٹ بن کا ڈھکنا اٹھاتی ہے اور بچہ اپنا ماسک اتار کر اس میں ڈال دیتا ہے۔
بچہ اسکول میں داخل ہوتا ہے تو ایک اور خاتون اسے جھک کر آداب کہتی ہے اور وہاں موجود سینیٹائزر سے وہ اپنے ہاتھ صاف کرتا ہے۔
اس کے ساتھ ہی ایک اور خاتون کھڑی ہے جو اس کے کپڑوں پر آگے اور پیچھے سپرے کرتی ہے تاکہ وہاں کوئی وائرس موجود ہو تو اس کا خاتمہ ہو جائے۔
اگلے مرحلے میں ایک مشین رکھی ہے، بچہ اس کے قریب اپنا چہرہ لے جاتا ہے اور ہاتھ اس کے اندر رکھ دیتا ہے۔ چند سیکنڈز وہ اسی حالت میں کھڑا رہتا ہے، بظاہر یہ اس کا درجہ حرارت اور کورونا کی دیگر علامات چیک کرتی ہے۔
یہ آخری مرحلہ ہے جس کے بعد ایک اور خاتون اسے ہاتھ سے پکڑ کر کلاس روم کی جانب لے جاتی ہے۔
کورونا وبا سے منسلک لاک ڈاؤن کے خاتمے پر چین میں اسکول کھل رہے ہیں جن میں مکمل احتیاطی تدابیر کی جا رہی ہیں تاکہ مستقبل کی نسل کو اس وبا سے محفوظ رکھا جائے اور ان کی تعلیم میں حرج بھی نہ ہو۔
پاکستان میں اگرچہ ابھی تعلیمی ادارے بند ہیں لیکن انہیں زیادہ عرصہ بند نہیں رکھا جا سکتا، اس ویڈیو سے ہماری حکومت بھی سبق حاصل کر سکتی ہے کہ کس طرح کورونا وبا سے بچوں کو بچا کر ان کی تعلیم شروع کی جا سکتی ہے۔
